Baush: Marrëveshja e Kosovës me EFTA mund të nxisë prodhimin e produkteve cilësore

Analisti ekonomik nga Shkupi, Abil Baush, thotë se nga nënshkrimi i Marrëveshjes së Tregtisë së Lirë të Kosovës me EFTA-n do të përfitojnë ato kompani në Kosovë që janë të orientuara drejt eksportit sepse do të zbuten barrierat e eksportit, ndërsa importet nga anëtarët e EFTA-s do të nënkuptojnë marrjen e produkteve cilësore, por edhe nxitje për të prodhuar produkte cilësore në Kosovë që do të jenë konkurruese në tregun e tyre.

Anëtarë të EFTA-s janë Islanda, Lihtenshtajni, Norvegjia dhe Zvicra dhe Baush thekson se çdo vend do të dëshironte të ishte pjesë e atij tregu dhe se Kosova ndoshta bashkëpunon më së shumti me Zvicrën.

Maqedonia e Veriut ka nënshkruar Marrëveshjen e Tregtisë së Lirë me EFTA-n në vitin 2000, por bashkëbiseduesi ynë thekson se në rastin e Maqedonisë së Veriut ka problem me shfrytëzimin e mundësive konkurruese.

“Nëse, për shembull, Serbia di të bëjë dhe shesë produkte bujqësore si në tregun zviceran, kjo nuk bëhet këtu ose bujqësia jonë nuk është e modernizuar sa duhet për të qenë konkurruese në këto tregje. Nga ana tjetër, me këto masa të kufizuara që kemi marrë gjatë goditjeve inflacioniste, marrim edhe produkte të cilësisë së ulët që hyjnë në vendin tonë si produkte të importit. Ne duhet të punojmë pak më shumë në krijimin e një komuniteti startup ku produktet tona mund të jenë konkurruese në treg”, tha Baush për Kosovo online.

Kur është fjala për bashkëpunimin ndërmjet Serbisë dhe anëtarëve të EFTA-s, ai thotë se Serbia ka bashkëpunim të mirë me Zvicrën, gjë që reflektohet në marketingun e produkteve industriale, bujqësore dhe të tjera që janë të standardizuara për atë treg, ndërsa në anën tjetër importon produkte të cilësisë së lartë.

Shqipëria, e cila ka një marrëveshje me EFTA-n që nga viti 2009, sipas Baush e ka shfrytëzuar mirë marrëveshjen në sektorët e ndërtimit dhe turizmit. Ajo tërhoqi turistë nga këto vende, por gjithashtu filloi të ndërtojë hotele cilësore në vend.

“Gjithçka që ata ndërtuan ishte në përputhje me standardet e kërkesave të EFTA-s dhe marrëveshjeve të tjera ndërkombëtare që ata nënshkruan. Serbia dhe Shqipëria dinin t'i shfrytëzonin mirë të gjitha këto, ndërsa ne, për fat të keq, ashtu si Maqedoni, mbetëm pas këtyre vendeve të Ballkanit Perëndimor. Maqedonisë i mbetet të përfitojë nga këto marrëveshje”, tha Baush.