Kosova po kërcënon sërish stabilitetin dhe energjinë evropiane, paralajmërohet për gjobitje prej pesë milionë eurosh dhe shkyçje nga sistemi

Operatori i Sistemit të Transmisionit dhe Tregut (KOSTT) rrezikon shkyçjen nga Zona Sinkrone e Evropës Kontinentale, për shkak të disbalancës të vazhdueshëm që po rrezikon edhe sistemin energjetik të Evropës Kontinentale. KOSTT-i është paralajmëruar për herë të fundit nga Operatorët Evropian të Sistemit të Transmisionit (ENTSO-E) se nëse kjo paqëndrueshmëri dhe problemet nuk rregullohen brenda 30 ditëve, Kosova do të shkyçet nga kjo zonë dhe madje paralajmërohet për gjobitje më shumë se pesë milionë euro, njofton Reporteri.

Gazeta “Infokus” ka siguruar letrën me të cilën “Operatorët Evropianë të Sistemit të Transmisionit të Energjisë Elektrike (ENTSO-E)” i janë drejtuar kryeshefit ekzekutiv të “KOSTT” Evetar Zeqirit dhe e paralajmëron atë se për shkak të këtij paqëndrueshmërie të vazhdueshme dhe mos respektimit të pikave kyçe të marrëveshjes, KOSTT rrezikon shkyçjen nga kjo zonë.

“Dhe kjo duket të jetë letra e fundit paralajmëruese, që paraqet edhe një afat të caktuar kohor prej 30 ditësh për përmirësimin e situatës ose KOSTT do të shkyçet nga marrëveshja. Në letër theksohet se pas disa takimeve dhe letrave të dërguara drejt KOSTT-it në Kosovë, kjo situatë u bë e patolerueshme, madje aty theksohet se Ukraina e cila është në luftë është duke mbajtur më mirë balancin e sistemit energjetik se sa Kosova.

KOSTT po akuzohet se nuk ka respektuar masat e marrëveshjes dhe se ky dështim, si dhe përdorimi i qëllimshëm i makinerisë, konsiderohet shkelje e qëllimshme e “Marrëveshjes së Kyçjes”, e cila për herë të parë ishte bërë në vitin 2015, derisa ishte vazhduar deri në vitin 2020 dhe 2022.