Arsiq: Persona të panjohur civilë erdhën në Rektorat me kërkesë që FSHT të shpërngulet brenda 30 ditësh

Rektori i Universitetit të Prishtinës me seli në Mitrovicën e Veriut, Nebojsha Arsiq, ka konfirmuar për Kosovo online se sot në mëngjes, siç thotë ai, persona të panjohur në rroba civile kanë ardhur në Rektorat të Universitetit me kërkesë që Fakulteti i Shkencave Teknike (FSHT) të shpërngulet brenda 30 ditësh ose të nënshkruajë një kontratë me Universitetin e Prishtinës.

Arsiq ka thënë se të gjithë të punësuarit në Rektorat janë befasuar në mënyrë të pakëndshme nga kjo ngjarje.

“Të gjithë u befasuam në mënyrë të pakëndshme. Nuk e dimë nëse bëhet fjalë për policinë, pasi personat ishin civilë. Ata sollën një dokument nga Universiteti i Prishtinës, në të cilin thuhet se ndërtesa e Fakultetit të Shkencave Teknike ndodhet në një lokacion që i përket Universitetit të Prishtinës dhe kërkohet që brenda 30 ditësh fakulteti të shpërngulet ose në ndonjë mënyrë të hyjë në marrëdhënie kontraktuale me ta. Ne i kemi shqyrtuar edhe parcelat kadastrale ku ndodhet ndërtesa e Fakultetit të Shkencave Teknike. Ato janë ‘parcelat e Trepçës’ dhe ajo ndërtesë kurrë nuk ka qenë pronë e Universitetit të Prishtinës, as para luftës”, ka thënë Arsiq.

Ai shtoi se për këtë situatë i kanë njoftuar organet më të larta të Serbisë dhe se po presin të shohin se cili do të jetë reagimi.

“Gjithashtu i kemi njoftuar edhe përfaqësuesit e bashkësisë ndërkombëtare. Përfaqësuesit tanë aktualisht janë në bisedime me ta për të parë se për çfarë bëhet fjalë. Megjithatë, kjo është vetëm edhe një dëshmi se Prishtina ka për qëllim të veprojë kundër Universitetit, Universitetit tonë”, theksoi rektori.

I pyetur se çfarë pret nga bisedimet për këtë çështje dhe nëse ka ndonjë zgjidhje në horizont, Arsiq tha se ky veprim i Prishtinës është edhe një provokim tjetër në vazhdën e tyre dhe një testim i pulsit për të parë se si do të reagojë Serbia.

“Ne jemi të vetëdijshëm për situatën në të cilën ndodhemi, të vetëdijshëm se pa shtetin tonë nuk mund të bëjmë asgjë vetë. Prandaj presim reagimin e organeve shtetërore për të parë se si do të zhvillohen më tej gjërat, ndërsa jemi në kontakt të vazhdueshëm si me ta, ashtu edhe me përfaqësuesit e bashkësisë ndërkombëtare”, përfundoi Arsiq.