Ashton: Duhet të gjejmë një mënyrë për ta bërë më të lehtë dhe më të shpejtë rrugën e Ballkanit drejt BE-së

Ish-përfaqësuesja e lartë e Bashkimit Evropian për Punët e Jashtme, Catherine Ashton, vuri në dukje sot se shpreson të shohë tashmë vendet e Ballkanit Perëndimor në Bashkimin Evropian, por që është ende një sfidë e madhe për të gjithë - si të sigurohet që rajoni të ecë përpara në rrugën e anëtarësimit.

“Unë jam nga Britania e Madhe, e cila është jashtë BE-së, kështu që nuk po flas për qeverinë time. Kur shikojmë botën, shohim tensione në rritje, rritje të populizmit, konfliktin në Ukrainë, kaos dhe kriza në Lindjen e Mesme... Vendet e Ballkanit Perëndimor janë në rrugën drejt BE-së dhe pyetja është si të përparojmë më shpejt në kontekstin e tensioneve gjeopolitike”, theksoi Ashton në panelin "Situata politike dhe e sigurisë në Ballkanin Perëndimor në kontekstin e ndryshimeve gjeopolitike në Evropë dhe botë", në kuadër të konferencës "Ballkani Perëndimor në BE" në Lubjanë.

Ajo falënderoi veçanërisht të dërguarin special të BE-së Miroslav Lajçak për kontributin që ka dhënë në afrimin e Ballkanit Perëndimor me BE-në.

“Askush nuk është përpjekur më shumë dhe ka pasur sukses më shumë se ti. Ti ke fokusuar në gjetjen e zgjidhjeve për probleme specifike. Ke shpenzuar shumë kohë duke biseduar me Serbinë dhe Kosovën për të zgjidhur problemin”, vuri në dukje Ashton.

Ajo paralajmëroi se duhet menduar gjithmonë për gjeneratat e ardhshme, sepse të rinjtë po largohen nga Ballkani Perëndimor.

"Duam që ata të kthehen në shtëpi, të hapin kompani, të kontribuojnë në zhvillimin e ekonomisë. Kjo nuk do të ketë sukses nëse nuk gjejmë një zgjidhje për tejkalimin e problemit", tha Ashton.

Ajo shprehu shpresën se pas 10 vitesh të gjithë do të bëjnë diçka tjetër.

“Duhet të mendojmë se çfarë nëse kemi progres të suksesshëm në rrugën drejt BE-së. Në përvojën time, njerëzit arrijnë në pozicione drejtuese dhe kanë frikë të bëjnë më shumë. Ndonjëherë, kur je i guximshëm dhe rregullon diçka, do të thotë të humbasësh mbështetjen, por është e nevojshme për të ardhmen e vendeve”, shtoi Ashton.