Drecun: Hyrja e Kosovës në NATO do të ishte shumë e keqe për serbët

Kryetari i Komisionit për Kosovë e Metohi në Kuvendin e Serbisë, Millovan Drecun, ka paralajmëruar sot se nëse Kosova anëtarësohet në NATO, situata e sigurisë në Kosovë do të ndryshojë rrënjësisht, gjë që është shumë e keqe për serbët, sepse do të rritet rëndësia e organizatave si p.sh. Forcat e Sigurisë së Kosovës, që janë pasardhëse e UÇK-së, shtoi ai.

Në TV Pink, Drecun theksoi se Perëndimi vepron sipas një matrice të caktuar dhe se dhuna ndaj serbëve shihet si incidente individuale për të cilat është përgjegjëse policia e Kosovës.

"Është shumë shqetësuese që së fundi kemi një fushatë të vazhdueshme të dhunës nga Prishtina kundër serbëve. Kemi gjithnjë e më shumë sulme ndaj fëmijëve dhe të rinjve serbë. Jemi përballur me nxjerrjen të papranueshme të armëve nën shpjegime jo koherente. Kjo është dëshmi se gjithçka që po ndodh është pjesë integrale e politikës e cila synon të ushtrojë presion mbi bashkësinë ndërkombëtare, mbi serbët në Kosovë e Metohi dhe Serbinë që ta kthejnë dialogun në drejtimin që i përshtatet Albin Kurtit dhe dëshmi se kriza dhe dhuna nuk do të ndalojë derisa të arrihet një zgjidhje që i përshtatet Prishtinës”, theksoi Drecun dhe shtoi se Perëndimi po e kalon në heshtje.

Ai gjithashtu theksoi se edhe pse policia dhe prokuroria i arrestojnë autorët e këtyre krimeve, gjithçka varet nga dënimi, sepse nëse dikush nuk dënohet për një vepër të tillë kriminale si sulm ndaj serbëve, kjo do t'i inkurajojë të tjerët të bëjnë njëjtë.

Drecun tha se KFOR-i po flet për tri unazat e sigurisë së Kosovës, se e para është Policia e Kosovës, e dyta është EULEX-i dhe e treta është KFOR-i, i cili reagon vetëm në situatat më kritike.

"KFOR-i ka lënë në duart e policisë së Kosovës të bëjë atë që bën, të zbatojë sundimin e ligjit. Por Prishtina këtë e zbaton vetëm në veri, derisa në jug të Ibrit, sundojnë bandat kriminale dhe nuk ka zbatim të sundimit të ligjit", shpjegoi ai.

Drecun theksoi se njësitë speciale të policisë kanë qenë të vendosura në jug të Ibrit dhe herë pas here kanë hyrë në veri, dhe Kurti përdori situatën në lidhje me targat për të ndërtuar baza të përkohshme për ta në veri përgjatë korridoreve të lëvizjes nga jugu në veri.

“Janë katër baza dhe planifikohet një tjetër, që është veçanërisht shqetësuese sepse kjo do të ishte bazë për Forcat e Sigurisë së Kosovës. Ministri i tyre i mbrojtjes tha se viti 2023 do të jetë viti i këtyre forcave, me investime në pajisje dhe staf profesional. Duke pasur parasysh atë që edhe Presidenti Vuçiq dje tha se Perëndimi do ta shtyjë Kosovën në NATO, është e qartë se Forcat e Sigurisë së Kosovës duhet të formohen shpejt. Ky është një rrezik për sigurinë e popullit serb. Përkundër asaj se KFOR-i ka dhënë garanci se këto forca nuk mund të jenë prezente në veri, ajo baza e pestë në zonën e Mokra Gorës tregon synimet e tyre. Nëse Kosova bëhet anëtare e NATO-s, do të ndryshonte rrënjësisht situatën e sigurisë dhe do të ishte shumë keq për ne", tha Drecun.

Drecun tha se heshtja për planin evropian të pesë vendeve të BE-së që nuk e njohën Kosovën është brengosëse.

Ai plan, shton ai, do t'i hapte plotësisht rrugën Kosovës drejt strukturave euroatlantike.

Kur bëhet fjalë për BKS-në, ai theksoi se amerikanët kanë një qëndrim pak më fleksibël se Gjermania dhe evropianët.

"Shtetet e Bashkuara të Amerikës thanë qartë se nëse Kurti nuk do ta formojë BKS-në, do ta bëjnë ata me sektorin civil. Ambasadori amerikan në Prishtinë thirri një takim me të gjithë liderët politikë dhe sektorin civil për këtë temë. Kurtit iu tha qartë se nëse ai nuk është i gatshëm të formojë BKS-në, kjo mund të shkaktojë një përmbysje politike, madje edhe zgjedhje”, shpjegoi Drecun.

Drecun tha se, nga ana tjetër, Gjermania ka një qasje të ndryshme.

Ai tha se në fillim të nëntorit në Gjermani, kancelari Ollaf Shollc ka mbajtur një takim lidhur me BKS-në, ku morën pjesë Kryeministri i Shqipërisë Edi Rama dhe ai i Kosovës, Albin Kurti.

“Ata diskutuan për BKS-në. Gjermania po përpiqet të shtyjë përmes organizatës joqeveritare të njërës prej partive të saj politike propozimin dhe pikëpamjen e saj për BKS-në, e cila do të ishte në përputhje me atë që dëshiron Kurti për ta bërë atë institucion të pakuptimtë”, paralajmëron Drecun.

I pyetur për vjedhjen e laptopit tek gjyqtari i Hagës, Drecun ka theksuar se më herët ka pasur rrjedhje të dokumenteve përmes veteranëve të UÇK-së, dy prej të cilëve janë dënuar për këtë dhe se situata tani është më e vështirë, sepse është kryer nga profesionistë.

"Unë supozoj se shërbimi i inteligjencës SHIK, të cilin Perëndimi nuk e ka shpërndarë, qëndron pas vjedhjes së laptopit. Tani ata duan të marrin sasinë maksimale të të dhënave që u nevojiten. Kjo mund të kërcënojë seriozisht sigurinë e dëshmitarëve, dhe mbi 300 dëshmitarëve janë paralajmëruar. Është një veprim serioz që duhet të ndërpritet sepse rrezikon gjyqet", tha Drecun.