Gjuriq dhe Stevanoviq: Marrëdhëniet mes Beogradit dhe Lubjanës janë të mira, stabile dhe miqësore

Ministri i Punëve të Jashtme të Serbisë, Marko Gjuriq, zhvilloi sot një takim me kryetarin e Parlamentit të Sllovenisë, Zoran Stevanoviq, ku diskutuan për marrëdhëniet dypalëshe, situatën në rajon dhe çështjet më të rëndësishme gjeopolitike. Të dy palët vlerësuan se marrëdhëniet mes Beogradit dhe Lubjanës janë të mira, stabile dhe miqësore, si dhe se ekzistojnë mundësi për thellimin dhe intensifikimin e mëtejshëm të bashkëpunimit.

Sipas njoftimit të Ministrisë së Punëve të Jashtme të Serbisë, Gjuriq theksoi se për Serbinë kanë rëndësi të veçantë bashkëpunimi në fushën ekonomike, politike dhe kulturore, si dhe bashkëpunimi në kontekstin evropian dhe rajonal.

Ai e falënderoi Stevanoviqin që për vizitën e tij të parë zyrtare zgjodhi Serbinë, duke theksuar se Beogradi e vlerëson mbështetjen e vazhdueshme të Sllovenisë për procesin e integrimeve evropiane dhe pret forcimin e mëtejshëm të saj në periudhën e ardhshme.

Gjuriq vlerësoi se Sllovenia është ndër njohëset më të mira të rajonit të Ballkanit Perëndimor brenda Bashkimit Evropian dhe se, me njohuritë dhe ndikimin e saj, mund të jetë një partner i rëndësishëm i Serbisë në Bruksel.

Ai shtoi se Serbia është e gatshme të përmbushë të gjitha kushtet e nevojshme në procesin e reformave, duke theksuar se lëvizja e lirë e njerëzve, mallrave, kapitalit dhe shërbimeve në rajon, me mbështetjen e duhur të Bashkimit Evropian, do të kontribuonte në uljen e tensioneve ekzistuese dhe përmirësimin e bashkëpunimit rajonal.

Gjuriq deklaroi se Serbia angazhohet për forcimin e bashkëpunimit dhe stabilitetit në rajon, zgjidhjen e çështjeve të hapura nga e kaluara dhe tejkalimin e dallimeve, duke ruajtur njëkohësisht interesat e saj kombëtare. Ai vlerësoi se Serbia përfaqëson një shtyllë të stabilitetit në Evropën Juglindore dhe theksoi se Bashkimi Evropian nuk do të jetë i plotë pa vendet e Ballkanit Perëndimor në përbërjen e tij.

Kreu i diplomacisë serbe shprehu gjithashtu pritjen që Sllovenia së shpejti të marrë një vendim formal për pjesëmarrjen në Expo 2027 në Beograd, për të cilin deri më tani janë regjistruar pothuajse 140 shtete, thuhet në përfundim të njoftimit.