Gjuriq me Sorensen: Beogradi është i shqetësuar për procedurat gjyqësore të motivuara politikisht kundër serbëve në Kosovë

Ministri i Punëve të Jashtme i Serbisë, Marko Gjuriq, u takua me përfaqësuesin special të BE-së për dialogun, Peter Sorensen, duke thënë se Beogradi është i përkushtuar ndaj procesit të normalizimit të marrëdhënieve, por paralajmëroi edhe për procese të motivuara politikisht kundër serbëve në Kosovë, të cilat krijojnë një atmosferë pasigurie.

Në takim u diskutuan planet e përfaqësuesit special të BE-së për ripërtëritjen e dialogut produktiv midis Beogradit dhe Prishtinës në nivel teknik dhe temat me interes të ndërsjellë që mund të jenë pjesë e axhendës së ardhshme të bisedimeve.

Shefi i diplomacisë serbe theksoi se Beogradi mbështet vazhdimisht procesin e normalizimit të marrëdhënieve dhe se ndan me BE-në një interes të përbashkët të padyshimtë për të bërë përparim në këtë proces.

Gjuriq theksoi se në vazhdimin e dialogut, duhet t'i kushtohet më shumë vëmendje situatës në terren, sepse deri më tani, theksohet në njoftimin, "kërcënimi dhe pengesa më e madhe për dialogun produktiv kanë qenë pikërisht veprimet e njëanshme të Prishtines dhe klima negative politike që u krijua në atë mënyrë".

Gjuriq shprehu shqetësim të veçantë për procedurat gjyqësore të motivuara politikisht kundër serbëve, të cilat synojnë të krijojnë një atmosferë pasigurie ligjore dhe ekzistenciale midis popullsisë serbe në Kosovë dhe Metohi, duke i kërkuar BE-së të përdorë ndikimin e saj për të parandaluar këtë lloj persekutimi politik”, thuhet në deklaratë.

Siç u theksua më tej, Gjuriq i uroi Përfaqësuesit Special të BE-së, Sorensen, suksese në punën e tij të ardhshme, duke thënë se në Beograd ai gjithmonë do të jetë në gjendje të mbështetet në një qasje konstruktive kur bëhet fjalë për procesin e normalizimit të marrëdhënieve me Prishtinën.