Hoti: Kurti nuk është i gatshëm të formojë AKS veçmas nga pikat e tjera, prandaj kërkon nënshkrimin e marrëveshjeve

Kryeministri i Kosovës Albin Kurti nuk është i gatshëm të formojë asnjë lloj Asociacioni të Komunave Serbe veçmas nga pikat e tjera të marrëveshjeve të arritura gjatë vitit të kaluar, në Bruksel dhe Ohër, prandaj ideja e tij është që të kombinohen të gjitha marrëveshjet që të dyja palët tashmë janë nënshkruar dhe i gjejmë në një dokument, thotë analisti Afrim Hoti. Kur një dokument i tillë të nënshkruhet nga të dyja palët, shton ai, atëherë Kurti do ta konsiderojë të detyrueshëm.

“Atëherë ai mund të shkojë në BE, SHBA apo kudo dhe të thotë: po, ne kemi një marrëveshje të nënshkruar dhe mund të shkojmë përpara”, thotë Hoti.

Mirëpo, Hoti sqaron se Konventa e Vjenës për të drejtën e traktateve specifikon procedurat dhe rregullat se si mund të arrihen marrëveshjet ndërkombëtare dhe thotë se sipas dispozitave të saj, një marrëveshje ndërmjet vendeve mund të arrihet pa u nënshkruar.

“Dhe Bashkimi Evropian e ka marrë parasysh këtë, pasi presidenti serb Aleksandar Vuçiq nuk ka dashur dhe ende refuzon të nënshkruajë marrëveshjen sepse nuk dëshiron të lërë diçka me shkrim. Nga këndvështrimi i BE-së, marrëveshja është e detyrueshme. Dhe kjo është e vërteta, siç e parashikon edhe Konventa e Vjenës”, thotë Hoti.

Në anën tjetër, thekson ai, Kurti insiston që të ketë një dokument të nënshkruar për të nxjerrë një dokument ligjërisht obligativ.

"Mirëpo, nga pikëpamja juridike, të dy versionet janë të zbatueshme. Ideja e Kurtit vjen nga aspekti praktik, sepse Serbia ka kohë që është dakord për diçka por nuk e zbaton", vlerëson Hoti.