Joksimoviq: Është e mundur që Trump t’i rikthehet dialogut ndërmjet Beogradit dhe Prishtinës

Drejtoresha e Qendrës për Politikë të Jashtme, Aleksandra Joksimoviq, thotë për Kosovo online se beson që presidenti amerikan Donald Trump, në periudhën e ardhshme, do të përpiqet të merret me çështjen e marrëdhënieve ndërmjet Beogradit dhe Prishtinës, pasi këtë temë e ka përmendur dy herë kohët e fundit, por se para së gjithash duhet parë nëse administrata amerikane do të ketë kapacitete për t’iu përkushtuar plotësisht kësaj.

Joksimoviq vëren se Trump ka dhënë dy deklarata kontradiktore brenda një periudhe të shkurtër – në njërën ai tha se kishte parandaluar një konflikt të hapur ndërmjet Serbisë dhe Kosovës para Marrëveshjes së Uashingtonit, ndërsa në deklaratën e fundit foli në kohën e tashme.

Sipas saj, duket se Trump është shumë i interesuar të zgjidhë disa çështje të rëndësishme.

“Ka tentuar të zgjidhë çështjen e luftës në Ukrainë, gjë që deri tani nuk i ka dalë, ndërsa kur flasim për Izraelin dhe Gazën, pastaj edhe për Izraelin dhe Iranin, ka bërë gjithashtu disa përpjekje, kryesisht përmes negociatave me Iranin, të cilat gjithashtu nuk patën sukses dhe përfunduan me konflikt në të cilin morën pjesë edhe SHBA-të. Çështja e marrëveshjes bërthamore duket se është jashtë tryezës së negociatave, dhe nuk është e sigurt nëse me sulmet është shkatërruar i gjithë potenciali i Iranit për prodhimin e armëve bërthamore. Shtrohet pyetja nëse Amerika, në këtë moment, përballë kaq shumë problemeve globale dhe me vëmendjen e përqendruar edhe në rajonin Indo-Paqësor, ka kapacitete të merret edhe me çështje të tjera dhe në çfarë momenti. Është e mundur që, në mungesë të proceseve të tjera të suksesshme negociatore, t’i rikthehet dialogut ndërmjet Beogradit dhe Prishtinës,” thekson Joksimoviq.

Vlerësime të tilla, thekson ajo, japin edhe disa analistë si Charles Kupchan, anëtar i Këshillit për Marrëdhënie me Jashtë të SHBA-së, i cili ka marrë pjesë në disa administrata të mëparshme.
Marrëveshja e Uashingtonit, kujton bashkëbiseduesja jonë, ishte një nga lëvizjet e fundit të Trumpit gjatë mandatit të tij të parë, dhe tani është një pyetje e madhe se në ç’mënyrë ai do të vazhdonte të merrej me këtë temë.

“A do të ishte fjala për këmbëngulje në implementimin e plotë të Marrëveshjes së Uashingtonit, pasi ajo nuk është zbatuar plotësisht, apo do të vendoseshin zgjidhje të reja inovative në tavolinë? Ajo që supozoj se do të mbetej si qasje, në krahasim me atë që kemi parë si shembuj në të kaluarën e afërt, është mungesa e koordinimit me Bashkimin Evropian. Si në çështjen e Ukrainës, ashtu edhe në rastin e Izraelit dhe Iranit, SHBA-ja thjesht e ka lënë Bashkimin Evropian dhe partnerët evropianë anash. Por, do të doja të kujtoja se para nënshkrimit të Marrëveshjes së Uashingtonit, kanë ekzistuar edhe ide të tjera për mënyrën se si mund të zgjidhej dialogu ndërmjet Beogradit dhe Prishtinës, dhe pikërisht vendet evropiane, me ndikimin e tyre, ndaluan zhvillimin e disa ideve në mënyrën siç e shihte atëherë Trump,” thekson Joksimoviq.

Nëse rrethanat kanë ndryshuar sot dhe nëse Trump ka më shumë apo më pak pushtet në kontekstin e dialogut midis Beogradit dhe Prishtines, thotë ajo, mbetet për t'u parë, si dhe nëse administrata amerikane do të ketë kapacitetin për t'iu përkushtuar plotësisht kësaj çështjeje.