Kosova e shpalli person të padëshiruar drejtorin e “Telekom Srbija”, Vladimir Luçiq

Ministria e Punëve të Brendshme e Kosovës e ka shpallur drejtorin e përgjithshëm të “Telekom Srbija”, Vladimir Luçiq, person të padëshiruar. Vendimi pasoi një ditë pasi Luçiq vizitoi pikën e kompanisë MTS d.o.o. në Mitrovicën e Veriut.

Vendimi është nënshkruar nga ministri i Punëve të Brendshme të Kosovës në detyrë, Xhelal Sveçla, dhe ka hyrë menjëherë në fuqi.

Sipas vendimit, Luçiqit i ndalohet hyrja në territorin e Kosovës.

Në arsyetimin e vendimit thuhet se, përmes deklaratave të tij, ai ka shprehur qëndrime të cilat, sipas vlerësimit të MPB-së së Kosovës, synojnë “rrezikimin e drejtpërdrejtë të sovranitetit, integritetit territorial dhe rendit kushtetues të Kosovës”, duke promovuar dhe mbështetur publikisht veprime dhe politika që kundërshtojnë institucionet kompetente të Kosovës.

Në vendim përmendet në mënyrë të veçantë sektori i telekomunikacionit, përfshirë infrastrukturën telekomunikuese, transmeton Gazeta 10.

Shtohet se vendimi është marrë në bazë të dispozitave të Ligjit për të Huajt dhe hyn në fuqi ditën e nënshkrimit.

Drejtori i përgjithshëm i “Telekom Srbija”, Vladimir Luçiq, vizitoi dje pikën e kompanisë MTS d.o.o. në Mitrovicën e Veriut, ku paralajmëroi modernizimin e telefonisë fikse në zonat e Kosovës ku jetojnë serbë, si dhe ndërtimin e objekteve të reja të kompanisë në disa komuna.

Me këtë rast, Luçiq tha se problemi i telefonisë mobile në të gjithë territorin e Kosovës ende mbetet i pazgjidhur, duke theksuar se Prishtina nuk e ka përmbushur detyrimin nga Marrëveshja e Brukselit që lidhet me shpalljen e tenderit për licencën e tretë.

Ai tha gjithashtu se kompania nuk planifikon të largohet nga kjo zonë.

“Besoj se ajo që po bën tani Telekom Srbija, pra fakti që po vazhdojmë të ndërtojmë objekte të reja, nuk është vetëm e mirë për cilësinë, por është edhe një simbol se ne, si kompani, nuk mendojmë të largohemi nga ky territor. Përkundrazi, jemi të bindur se në një moment do të marrim lejet për të operuar në të gjithë territorin e Kosovës dhe Metohisë, se do të jemi operatori më i madh dhe se do ta kenë të vështirë të na pengojnë në këtë drejtim”, përfundoi Luçiq.