Lista Serbe kërkon sqarime për kthimin e policëve në punë: Në rastin e Rashkoviqit asnjë pyetje nuk duhet të mbetet pa përgjigje

Lista Serbe i ka kërkuar Inspektoratit Policor të Kosovës, prokurorisë dhe Policisë së Kosovës që t’u përgjigjen pyetjeve se kush dhe mbi bazën e cilave gjetje e ka marrë vendimin për kthimin në punë të dy policëve të suspenduar nën dyshimin se janë të përfshirë në rastin e keqtrajtimit të Nenad Rashkoviqit nga Dreni, si dhe nëse hetimet kanë përfunduar dhe, nëse jo, përse ata janë kthyer në detyrë para përfundimit të tyre.

Lidhur me informacionin se dy pjesëtarë të Policisë së Kosovës, të suspenduar nën dyshimin se janë të përfshirë në rastin e keqtrajtimit të Nenad Rashkoviqit nga Dreni, janë kthyer në punë pas një muaji, Lista Serbe bëri të ditur se “shpreh mosbesim” dhe kërkon një sqarim të plotë dhe publik nga institucionet kompetente për arsyet dhe bazën ligjore të një vendimi të tillë.

“Veçanërisht shqetësues është fakti se publiku deri më sot nuk ka informacion të qartë se çfarë ka konstatuar hetimi i Inspektoratit Policor të Kosovës, në cilën fazë ndodhet procedura dhe mbi bazën e cilave rrethana është marrë vendimi për përfundimin e suspendimit dhe kthimin e policëve në detyrë”, thekson Lista Serbe.

Në komunikatë thuhet gjithashtu se vendimi për kthimin e tyre në punë, pa një arsyetim të plotë dhe bindës nga institucionet, krijon te komuniteti serb përshtypjen se pretendimet e rënda për dhunë policore ndaj serbëve nuk po marrin përgjigjen e duhur institucionale dhe se për veprime të tilla nuk ka pasoja reale.

“Pikërisht për këtë arsye, ky rast kërkon transparencë maksimale dhe përcaktimin e përgjegjësisë individuale në një procedurë ligjore. Kërkojmë që Inspektorati Policor, prokuroria dhe Policia e Kosovës të përgjigjen publikisht se kush dhe mbi bazën e cilave gjetje e ka marrë vendimin për kthimin e këtyre policëve në punë, nëse hetimi ka përfunduar dhe, nëse jo, përse ata janë kthyer në detyrë para përfundimit të tij”, thuhet nga Lista Serbe.

Lista Serbe kërkon gjithashtu sqarim nga prokuroria për masat që janë ndërmarrë në këtë rast ndaj të dyshuarve, përfshirë edhe nëse është shqyrtuar apo kërkuar caktimi i paraburgimit ose i masave të tjera gjatë procedurës dhe mbi bazën e cilave arsye ligjore dhe faktike është vendosur për këtë çështje.

“Nga EULEX-i presim që t’ia paraqesë publikut gjetjet e monitorimit të këtij rasti dhe të bëjë të ditur nëse kthimi në punë i personave përgjegjës për rrahjen e rëndë dhe shkaktimin e lëndimeve të rënda trupore ndaj Nenad Rashkoviqit, nxjerrjen me detyrim të deklaratës dhe keqpërdorimin e pozitës zyrtare, është vendim i drejtë i Inspektoratit Policor. EULEX-i, sipas mandatit të tij aktual, nuk ka rol ekzekutiv hetimor, por monitoron veprimet e policisë, prokurorisë dhe gjykatave, përfshirë rastet e ndjeshme ndëretnike dhe pretendimet për sjellje të pahijshme të policisë”, rikujton Lista Serbe.

Lista Serbe porosit gjithashtu se në rastin e Nenad Rashkoviqit asnjë pyetje nuk duhet të mbetet pa përgjigje.

Se dy policët e Kosovës janë kthyer në punë në stacionin policor në Mitrovicën e Veriut, e konfirmoi për Kosovo online shefi i Njësisë për Planifikim dhe Vlerësim Operacional, Erduan Baliqi, duke shpjeguar se u kishte skaduar masa e suspendimit e vendosur më herët nga Inspektorati Policor i Kosovës.

Serbi Nenad Rashkoviq nga fshati Dren u plagos rëndë më 11 gusht, pasi, sipas rrëfimit të tij, ishte rrahur nga policët e Kosovës.

Rashkoviq u pranua në QKS “Kosovska Mitrovica”, por për shkak të peshës së lëndimeve të marra u transferua për trajtim në Qendrën Klinike të Serbisë në Beograd.

Për shkak të akuzave të tij, Inspektorati Policor i Kosovës nisi hetime sipas detyrës zyrtare dhe më pas i rekomandoi Policisë së Kosovës suspendimin e dy policëve të Drejtorisë Rajonale të Policisë në Mitrovicën e Veriut, nën dyshimin për veprën penale “keqtrajtimi gjatë ushtrimit të detyrës zyrtare ose autorizimeve publike”.