Lista Serbe: Sulmi ndaj Peroviqit ishte i motivuar politikisht, kërkojmë një hetim urgjent dhe të pavarur

Lista Serbe dënoi ashpër sulmin e mbrëmshëm me një pajisje shpërthyese në një bar në pronësi të kandidatit të tyre për kryetar të komunës së Zubin Potokut, Millosh Peroviq, duke theksuar se ky është një akt frikësimi i motivuar politikisht, i cili synon të kërcënojë sigurinë e popullit serb dhe të ngjallë frikë tek kandidatët e kësaj partie.

Me atë rast, u shkaktuan dëme të mëdha materiale dhe është mjaft e qartë se sulmi ishte i motivuar politikisht, me qëllim të qartë për të frikësuar kandidatët e Listës Serbe dhe familjet e tyre dhe për t'i penguar ata të luftojnë për interesat e popullit serb, thuhet në njoftimin e Listës Serbe.

"Nuk është hera e parë që individët shqetësohen nga thirrja jonë për unitet, harmoni dhe mirëkuptim, por themi se asnjë presion dhe kërcënim nuk do të na lëkundë në mbrojtje të popullit tonë dhe të drejtës për të jetuar në paqe dhe siguri. Ne kërkojmë një hetim urgjent dhe të pavarur të këtij sulmi, i cili duhet të kryhet nën syrin vigjilent të organizatave ndërkombëtare, kryesisht EULEX-it, sepse me të drejtë dyshojmë në dëshirën dhe kapacitetin e policisë së Kosovës për të hetuar këtë rast në një mënyrë profesionale dhe të paanshme. Udhëheqja e Listës Serbe do të vizitojë z. Peroviq sot. Në të njëjtën kohë, po dërgojmë një mesazh të qartë se qëndrojmë fort pranë të gjithë kandidatëve tanë, të vendosur fort për të luftuar për drejtësi, siguri dhe paqe për të gjithë qytetarët tanë", është shkruar në njoftimin e Listës Serbe.