Odalloviq: Nuk ka të ardhme për serbët në Kosovë përderisa Prishtina e ndjek këtë politikë

Duhet të zbatohet marrëveshja e Brukselit, të formohet Bashkësia e Komunave Serbe, që serbët nga Kosova të kenë një mjedisi ku ka siguri, thotë Kryetari i Komisionit të Qeverisë së Serbisë për persona të pagjetur, Velko Odalloviq, raporton RTS.

Gjatë fundjavës, në dy incidente të ndara në zonat serbe në Kosovë, një i ri serb është plagosur me thikë në afërsi të Vitinës, ndërsa disa plumba janë shkrepur nga një veturë në lëvizje në Graçanicë.

"Ka një vazhdimësi të sulmeve ndaj serbëve dhe nuk ka dëshirë që shqiptarët ta dënojnë dhe të ndëshkojnë autorët. Këto janë sulme të motivuara", tha Odalloviq në programin e mëngjesit të RTS.

Odalloviq rikujton se në të njëjtën kohë institucionet e Prishtinës po bëjnë shpronësimin e tokës në veri të Kosovës dhe po përpiqen të shkaktojnë incidente për të arsyetuar synimin e tyre për të ushtruar kontroll të plotë mbi tërë Kosovën, në radhë të parë në pjesën veriore.

“Ne kemi të rinj të plagosur, njerëz në burgje. Serbët nuk janë të sigurt, as në zona të pastra etnike, as në zona multietnike, as në rrugë. Nuk ka të ardhme për ta përderisa Prishtina e ndjek këtë politikë, sepse ata shohin Kosovën pa serbët dhe Kosovën si shtet të vetëshpallur”, ka thënë Odalloviq.

Kryetari i Komisionit qeveritar thotë se BKS është pjesë e marrëveshjes së nënshkruar 10 vjet më parë dhe që nga atëherë kanë kaluar disa qeveritë në Prishtinë dhe asnjëra prej tyre nuk ka dashur të formojë BKS.

Sot në Beograd vjen Miroslav Lajçak, përfaqësuesi special i BE-së për dialogun ndërmjet Beogradit dhe Prishtinës, i cili paraprakisht do të vizitojë edhe Prishtinën. Lajçak qëndroi në janar si pjesë e “pesëshes së madhe”.