Pavkoviq: Kurti institucionalizoi taktika ekstreme partiake ndaj komunitetit serb 

Millosh Pavkoviq, bashkëpunëtor në Qendrën për Politika Evropiane në Beograd, deklaroi se pavarësisht nga rezultati i dobët zgjedhor dhe dyshimet për formimin e qeverisë së re “Kurti 3”, Lëvizja Vetëvendosje nuk ka “ambicie” për të bërë ndryshimet e kryesuesit të kryesisë në parti. Ai sqaron se Albin Kurti me ardhjen në pushtet vetëm se ka instrumentalizuar taktikat ekstreme partiake kundër komunitetit serb.

“Unë nuk pres që Kurti të zëvendësohet në këtë moment. Më duket se Vetëvendosja është ngritur në atë mënyrë që besnikëria ndaj tij të jetë e padiskutueshme, se ka një kult të liderit – liderit për të cilin askush nuk dyshon. Dhe unë nuk shoh ndonjë ambicie midis anëtarëve për të bërë një ndryshim në këtë pikë. Nëse Kurti nuk e formon qeverinë dhe nëse e bën dikush tjetër, atëherë mund të dalë përgjegjësia e tij e mundshme para organeve partiake, por përderisa ekziston mundësia për formimin e qeverisë, nuk do të jetë temë e diskutimeve brenda partisë”, tha Pavkoviq për Kosovo online.

Ai saktësoi se Glauk Konjufca po përmendet në publik si kundërshtar i mundshëm i Kurtit.

“Në atë lëvizje ka qenë që në fillim, që nga viti 2005. Është zgjedhur në zgjedhjet e para në të cilat ka marrë pjesë Vetëvendosje, në vitin 2010 ka qenë kryetar i grupit parlamentar, ka qenë ministër i Punëve të Jashtme, ka qenë ushtrues detyre i presidentit të Kosovës dhe është kryetar i Kuvendit tash e disa vite. Ai është në fakt një nga personeli më i mirë që ka Vetëvendosje. Ai ka qenë atje që nga themelimi i lëvizjes dhe gëzon besimin e anëtarësimit," beson Pavkoviq.

Një pyetje shumë më e rëndësishme, thekson ai, është nëse Konjufca thjesht do të vazhdonte taktikat aktuale të Albin Kurtit.

“Që nga viti 2005 e deri në ardhjen në pushtet të Vetëvendosjes, Kurti përdori taktika jashtëzakonisht ekstreme dhe mblodhi anëtarët dhe votuesit e ekstremit të djathtë të lëvizjes së tij. Nga shkatërrimi i automjeteve të UNMIK-ut dhe BE-së, deri te krijimi i trazirave në rrugë dhe hedhja e gazit lotsjellës në Kuvend kur ata ishin deputetë të opozitës. Pra, ishte ai që udhëhoqi atë lloj lufte politike jo standarde dhe me veprime të tilla fitoi pozitën e liderit të padiskutueshëm të partisë. Dhe kjo është ende e padiskutueshme”, saktëson Pavkoviq.

Ai shton se Kurti nuk e braktisi këtë taktikë as kur u bë kryeministër.

“Udhëheqja e tij është e padiskutueshme sepse ai e ka institucionalizuar këtë lloj taktike ndaj komunitetit serb. Dhe kjo është mënyra se si ai i plotëson nevojat e tij ekstremiste duke zbatuar taktika ekstreme përmes monopolit legjitim të përdorimit të forcës fizike, strukturave të policisë dhe sigurisë së Kosovës, dhe kështu duke kanalizuar nevojat e anëtarëve të saj. Prandaj mendoj se autoriteti i tij është i padiskutueshëm në parti derisa të ketë një ndryshim zyrtar në qeveri. Atëherë mund të jetë e hapur çështja e pozitës së tij si kryetar i Lëvizjes”, thekson Pavkoviq.