Punëtorët e ndërmarrjeve komunale në veri të Kosovës janë të indinjuar: E kemi marrë rrogën, por nuk mund ta tërheqim

Disa qindra punonjës të ndërmarrjeve publike në Mitrovicën e Veriut dolën para degës së Poshtanska Shtedionica në atë qytet me qëllim të tërheqjes së pagave të tyre, të cilat u janë paguar sot nga buxheti i Qeverisë së Serbisë. Ata thanë Kosovo online se janë të indinjuar sepse mund të tërheqin maksimumi 10 mijë dinarë pasi që nuk ka para për shkak të vendimit të BQK për ndalimin e dinarit.

Punëtorët e ndërmarrjes komunale “Standard” si dhe “Vodovod Ibar” sot janë në radhë për pagesën e pagave. Në bankomat nuk ka para, ndërsa në sportele mund të tërheqin deri në 10.000 dinarë, përderisa të ketë rezerva.

Njëri nga punëtorët e grumbulluar, Hazir Krasniqi, ka thënë për Kosovo online se paratë i janë derdhur në llogarinë e tij dje pasdite kur ka marrë një mesazh nga banka.

“Kam qenë në Postë, ishte e mbushur me njerëz, e shihni vetë se sot është e mbushur me njerëz, 70 për qind jemi romë, kemi fëmijë dhe familje, nuk mund të tërheqim para fare, mund të tërheqim vetëm pak, por kjo nuk do të thotë asgjë për ne. Deri në 10,000 dinarë. Kjo do të shkojë shpejt, dhe nesër do të jetë po aq e mbushur me njerëz. E gjithë kjo është ngacmim. Jemi të indinjuar dhe kjo po na e bën jetën shumë më të vështirë", tha Krasniqi.

Me të pajtohet edhe Sllagjana Milenkoviq. Ajo thekson se personat që marrin rrogë në dinarë janë të indinjuar me vendimin e qeverisë së Kosovës për ndalimin e monedhës serbe dhe se kjo ua vështirëson jetën.

“Sigurisht që jemi të hidhëruar për këtë vendim, na e bën jetën të vështirë, nuk mund të tërheqim rrogën, kështu është për të gjithë ne, disa kanë mundësi të shkojnë në Serbinë Qendrore për të ngritur rrogën e tyre, e disa jo. Ne të rinjtë disi, e ku janë pensionistët, është vërtet e vështirë për të moshuarit, kam qenë një herë në sportel, kam tërhequr 10 mijë, por është e kufizuar si për mua ashtu edhe për njerëzit e tjerë nga pjesa veriore e Mitrovicës", tha Milenkoviq.

Aleksa Radosavljeviq thotë se situata pas heqjes së dinarit është shumë e vështirë për serbët në Kosovë.

“Është një situatë shumë e vështirë, unë jam punëtor në ndërmarrjen komunale ‘Vodovod Ibar’, punojmë 24 orë në ditë, jemi në shërbim të qytetarëve të gjitha nacionaliteteve, të ardhurat tona personale janë paguar, megjithatë nuk ka para në banka, për këtë arsye njerëzit detyrohen të shkojnë në Rashkë, Novi Pazar, Kraljevë për të ngritur pagat, është një situatë shumë e vështirë, në vendkalimin Jarinje ka një turmë të madhe, radhë të mëdha, duke pritur për 2-3 orë, shumë e vështirë”, thotë Radosavljeviq.