Simiq: Serbët në Kosovë prej 23 vitesh jetojnë në frikë të përhershme, të vendosur për paqe dhe dialog

Nënkryetari i Listës Serbe, Igor Simiq, ka theksuar sot se serbët në protestën në Shtërpcë, pas plagosjes së djalit dhe të riut serb në Gotovushë dhe rrahjes së një të riu në Kllokot, kanë thënë qartë se duan të jetojnë në paqe, të qëndrojnë dhe të mbijetojnë në Kosovë dhe se gjëra të tilla nuk do të përsëriten më, dhe theksoi se disa e perceptojnë qartë heqjen e barrikadave në veri si dobësi.

“Vendosmëria e serbëve për të qëndruar dhe mbijetuar në Kosovë e Metohi nuk është vënë asnjëherë në pikëpyetje. Është e vështirë kur dikush tenton të vrasë një fëmijë dhe një të ri në Ditën e Buzmit. Për 23 vjet serbët në Kosovë janë mësuar të vuajnë terrorin dhe hipokrizinë e bashkësisë ndërkombëtare”, tha Simiq për TV Prva.

Simiq kritikoi bashkësinë ndërkombëtare për mospërmendjen e kombësisë së djemve dhe të rinjve të plagosur dhe të sulmuar në asnjë njoftim apo mesazh.

Sipas tij, kjo është kështu, sepse e prish narrativën “për serbët e këqij”, të cilën kryeministri i Kosovës Albin Kurti, me ndihmën e vendeve perëndimore, po e propagandon.

“Ajo që pamë dje në Shtërpcë ishte një mesazh paqeje. Dëshiroj të falënderoj të gjithë serbët që erdhën në Shtërpcë dhe dërguan një mesazh unik se ne duam të jetojmë në paqe, të mbijetojmë dhe të qëndrojmë, se ajo që ndodhi në Gotovushë dhe Kllokot nuk duhet të përsëritet më dhe se prania e forcave ndërkombëtare duhet të jetë në një nivel më të lartë, mbi të gjitha në jug të Kosovës”, shpjegoi Simiq.

Ai tha se derisa kanë zgjatur barrikadat në veri të Kosovës, serbët kanë dëgjuar forcat ndërkombëtare duke u kujdesur për sigurinë, dhe ka kujtuar se gjatë atyre 20 ditëve nuk është lënduar asnjë shqiptar në veri, ndërsa në jug nuk ka pasur asnjë pjesëtarë të forcave ndërkombëtare për të mbrojtur fëmijën dhe të riun.

“Asnjë shqiptar nuk është lënduar sepse nuk është ky qëllimi ynë dhe nuk kemi asgjë kundër popullit shqiptar, por po luftojmë kundër regjimit të Kurtit dhe Vjosa Osmanit”, ka theksuar Simiq.
Simiq tha se serbët janë gjithmonë të përkushtuar ndaj paqes dhe dialogut dhe nuk duan të vuajnë dhunën.

“Padyshim që dikush percepton thirrjen tonë për paqe dhe heqjen e barrikadave si dobësinë tonë. Nuk kishim frikë. Ne duam vetëm paqe, të jetojmë në kushte normale dhe jo që kur fëmijët tanë të ikin për buzmin, ne nuk e dimë nëse do të kthehen në shtëpi”, tha ai.

Simiq tha se serbët në Kosovë kanë 23 vjet që jetojnë në frikë të përhershme.

“Shumë gjëra të këqija u ndodhin serbëve në jug dhe veri të Kosovës. Një problem kapërcen një tjetër. Ju as nuk mund ta kuptoni se çfarë po kalojmë”, theksoi Simiç.

Ai përkujtoi se Stefan dhe Millosh nuk janë qëlluar nga një kalimtar, por nga dikush që është pjesë e institucioneve të Kosovës, pjesëtar i KBS-së dhe për këtë, siç ka thënë ai, duhet të mbajë përgjegjësi të veçantë.

Ai theksoi se mediat shqiptare po mundohen ta paraqesin rastin si rastësi.

Ai ka deklaruar se torturat e serbëve nga institucionet e Kosovës vazhdojnë në veri, duke kujtuar se disa fshatra afër Leposaviqit janë shkëputur nga pjesa tjetër e komunës, për shkak të hapjes së rrugëve, të cilat janë rregulluar me urdhër të komandantit të KFOR-it.

Simiq po ashtu ka deklaruar se në kalanë e Zveçanit forcat speciale të policisë së Kosovës ngrenë dronë dhe fotografojnë duke provokuar dhe nxitur reagimin e serbëve.

“Ka një presion të vazhdueshëm ndaj të cilit janë të ekspozuar serbët dhe ka heshtja e përfaqësuesve ndërkombëtarë. Asnjë i dërguar special nuk reagoi ndaj sulmit të Stefanit dhe Milloshit dhe kur u hodhën mjete piroteknike, reagoi e gjithë Evropa. Ne nuk jemi as të sigurt që kjo ngjarje ka ndodhur dhe u përballëm me dënimet më të ashpra, sikur të ishin vrarë 20 persona. Nuk ka lot për serbët”, tha ai.