Vuçiq: Jam optimist për pozitën e serbëve në Kosovë pas pesë ose dhjetë vitesh

Presidenti i Serbisë, Aleksandar Vuçiq, ka deklaruar sonte se nuk është optimist se pas zgjedhjeve lokale në Kosovë do të ndryshojë menjëherë situata për popullin serb, por theksoi se është optimist sa i përket pozitës së serbëve në Kosovë pas pesë ose dhjetë vitesh.

“Nuk jam optimist se zgjedhjet tani do të ndryshojnë diçka, por jam optimist për pozitën e serbëve pas pesë ose dhjetë vitesh, dhe kjo bazohet në logjikën e argumenteve të hekurt”, tha Vuçiq për RTS.

Ai shtoi se pas zgjedhjeve lokale në Kosovë i ka uruar Listës Serbe për një rezultat të pamundur, duke theksuar se të gjithë të huajt kanë punuar kundër tyre ,para së gjithash ata nga Perëndimi, por edhe disa në Serbi që janë kundër pushtetit, ndërkohë që të gjitha burimet shqiptare janë përdorur për të ndihmuar kundërshtarët e tyre.

Vuçiq theksoi se në Listën Serbe janë njerëz me autoritet nga të gjitha pjesët e Kosovës.

Presidenti veçoi si veçanërisht të rëndësishme fitoren e Listës Serbe në Graçanicë, duke kujtuar se lista e bashkuar shqiptare mori 23 për qind të votave.

Ai tha se synimi kishte qenë që me Nenad Rashiqin të formohej një pushtet shqiptar, por kjo nuk ndodhi, pasi Lista Serbe mori mbi 60 për qind të votave.

I pyetur se çfarë do të mund të bëjnë në komunat ku po kthehen në pushtet, duke pasur parasysh të gjitha vendimet e deritanishme që nuk kanë qenë në dobi të popullit serb, Vuçiq tha se ata nuk kanë mundur ta ndalojnë këtë, por se Serbia do të vazhdojë të ndihmojë popullin e vet në Kosovë.

“Nuk mund të ndalojnë që ne të vazhdojmë të ndihmojmë popullin serb, edhe pse kjo është nën presion të madh. E patë reagimin e përfaqësuesit të BE-së në Prishtinë, i cili u tmerrua që po punësojmë 400 persona në institucionet tona shëndetësore. E ku ke qenë ti...? A e ke lexuar Marrëveshjen e Brukselit, a e di çfarë shkruan në dokumente, për çfarë është biseduar dhe negociuar?”, pyeti presidenti i Serbisë.

Ai përsëriti se shteti i Serbisë do të jetë gjithmonë pranë popullit të vet dhe do ta ndihmojë atë.

“Dhe njerëzit e dinë sa e vështirë është kjo, ashtu siç e dinë se është e pamundur të bëhet më e lehtë, sepse Kosova shpalli pavarësinë në vitin 2008, kur ndoshta edhe mund të ishte reaguar. Por atëherë u pritën zgjedhjet... Por edhe pas 17 vitesh ende po përballen me Serbinë, sepse një Serbi e lirë dhe e pathyeshme nuk e pranon atë pavarësi,” tha Vuçiq.

Në pyetjen se mbi çfarë baze mendon se pas pesë vitesh do të jetë më mirë, ai u përgjigj se nuk mund ta zbulojë, por përsëriti se bëhet fjalë për logjikën e “argumenteve të hekurt”, me të cilën gjithmonë udhëhiqet.

I pyetur nëse e ka thirrur presidenti turk Rexhep Tajip Erdogan, ai u përgjigj negativisht, por shtoi se tashmë ia ka transmetuar qëndrimet e Serbisë.

“Nuk më ka thirrur, por gjithsesi do të takohemi... Do t’i them atë që tashmë ia kam thënë në Nju Jork dhe më herët, ashtu siç më tha edhe ai – se nuk pajtohet me këtë. Por ai është një lider i madh, për respekt, që e ka ngritur Turqinë dhe e ka bërë fuqi të madhe. Nuk është gjithmonë çdo gjë që bën në përputhje me interesat tona, dhe s’ka këtu asnjë filozofi,” tha Vuçiq.

Ai njoftoi se shumë shpejt do të shkojë në një darkë pune bilaterale te presidenti francez Emmanuel Macron.

Në lidhje me situatën në Republikën Sërpska, Vuçiq tha se gjithmonë i dëshiron më të mirën dhe shpreson që në periudhën e ardhshme gjithçka të kalojë në paqe.

“Unë jam i lumtur kur Republika Sërpska është e lumtur. Ne mund të ndihmojmë në ndërtimin e infrastrukturës dhe rrugëve, dhe këtë do ta bëjmë,” tha presidenti i Serbisë.

Për afatet e anëtarësimit të Serbisë në BE: Do të ketë shumë befasi

I pyetur se si është qëndrimi i Bashkimit Evropian ndaj Serbisë, Vuçiq u përgjigj se tani ekziston një vrull i ri dhe se në Bashkim e kuptojnë që Serbia është më e rëndësishme se më parë.

“Ne për tre vjet e gjysmë nuk kemi hapur asnjë kapitull. Kjo përkon me fillimin e luftës në Ukrainë. Në dhjetor të vitit 2021 kemi hapur kapitullin e fundit,” kujtoi Vuçiq.

Presidenti tha se në atë kohë të gjithë të tjerët në rajon filluan të theksonin se ishin 100 për qind të harmonizuar me politikën e BE-së, ndryshe nga Serbia.

“Besoj se tani ekziston një vrull i ri dhe se ata e kuptojnë që Serbia është e rëndësishme për Bashkimin, pak më shumë se më parë. Për ne BE-ja është e rëndësishme, nuk ka iluzione për këtë. Bashkimi Evropian është investitori më i madh, vendi ku, pavarësisht problemeve, jetohet më mirë dhe ku ne i përkasim,” shpjegoi Vuçiq.

I pyetur për afatet kohore të mundshme për anëtarësimin e Serbisë në BE, ai tha se “do të ketë shumë befasi.”

“Do të ketë shumë vendime të ndryshme gjeopolitike në një vit e gjysmë të ardhshme,” theksoi Vuçiq, duke vlerësuar se për Serbinë po hapen disa mundësi.

Në pyetjen nëse beson se ekziston mundësia që Serbia të pranohet para vitit 2030, ai u përgjigj se “beson se ka mundësi të tilla.”

Megjithatë, ai kujtoi se në rrugën drejt BE-së ekziston një problem – çështja e Kosovës.

“Ekziston një çështje – si të zgjidhet çështja e Kosovës dhe Metohisë. Unë të pranoj pavarësinë nuk mund dhe nuk do ta bëj, dhe nëse dikush pas meje dëshiron ta bëjë, le ta bëjë,” tha Vuçiq.

Serbia prej kohësh është e rrezikuar nga presionet që vijnë nga drejtime të ndryshme të botës

Vuçiq theksoi se presionet dhe ndikimet hibride nga drejtime të ndryshme e kanë vënë vendin në rrezik tashmë për një periudhë të gjatë.

“Si president i Serbisë kam bërë gjithçka për të ruajtur paqen dhe stabilitetin. Sanksionet ndaj NIS-it dhe të gjithë presionet që na vijnë nga anë të ndryshme të botës, ndikimi hibrid që vjen nga shumë drejtime, janë diçka që e kanë rrezikuar Serbinë për një kohë të gjatë,” tha Vuçiq.

Ai theksoi se arsyeja kryesore është politika e qartë, e pavarur dhe sovrane që ndjek Serbia, politikë që, sipas tij, “nuk i pëlqen askujt përveç qytetarëve të Serbisë.”

“Prandaj, kjo politikë duhet të rrëzohet,” shtoi Vuçiq.

Ai theksoi gjithashtu se ekzistojnë rreziqe politike për Serbinë dhe se përkeqësimi i situatës gjeopolitike është një problem serioz.

“Nëse vjen deri te një luftë e vërtetë midis Evropës dhe Rusisë, ky do të jetë rreziku më i madh. Ne duhet të shmangim përfshirjen në çdo mënyrë dhe duhet të ruajmë neutralitetin tonë ushtarak. Në çdo mënyrë. Çfarëdo konflikti rajonal do ta shmangim me çdo kusht. Pra, ne nuk kemi frikë nga askush. Jemi mjaft të fortë – njerëzit e kanë parë këtë – por unë nuk dua të marr pjesë në luftëra,” tha qartë presidenti Vuçiq.

Sa i përket sanksioneve ndaj NIS-it, ai porositi se qytetarët nuk duhet të shqetësohen.

“Ditën e parë kur të kemi probleme, do t’i zgjidhim dhe do ta mbrojmë Serbinë. Nuk do të ketë mungesë. Besoj se do të kemi mjaftueshëm energji elektrike, por duhet të merremi me këtë çështje në vitet që vijnë. Do t’i zgjidhim edhe të gjitha problemet me gazin,” theksoi Vuçiq.

Ai bëri të ditur gjithashtu se me kryeministrin hungarez Viktor Orban ka rënë dakord për import më të madh të derivateve të naftës nga kompania MOL në Serbi.

Në lidhje me importin e gazit nga Rusia, Vuçiq theksoi se rusët janë partnerë të besueshëm, por se nuk e kupton “lojën rreth nënshkrimit të marrëveshjes për gazin”, duke shtuar se është e mundur që kjo të ketë lidhje me NIS-in.

Ai kujtoi se Serbia nuk importon më naftë ruse.

“Po ndërtojmë një naftësjellës drejt Hungarisë, që të mund të marrim naftë nga ‘Družba’ përmes Hungarisë, e jo vetëm nga JANAF. Po kështu edhe me gazin, duhet të ndërtojmë interkonektorë drejt Rumanisë dhe Maqedonisë së Veriut,” ka shpjeguar Vuçiq.