Zyrtari i NATO-s: Presim konsultime me kohë për çdo veprim të PK-së apo FSK-së që mund të ndikojë në sigurinë rajonale

Presim konsultime me kohë për çdo veprim të Forcave të Sigurisë së Kosovës apo Policisë së Kosovës që mund të ndikojë në sigurinë rajonale, thotë zyrtari i NATO-s i pyetur nga Kosovo online nëse Policia e Kosovës duhet ta informojë KFOR-in për veprimet e tyre.

Siç thuhet në përgjigjen me shkrim për portalin tonë, qëndrimi i NATO-s është “i qartë dhe konsistent”.

“Policia e Kosovës nuk ka pse të informojë komandantin e KFOR-it për të gjitha lëvizjet e tyre nëpër Kosovë. Por siç e bëri të qartë Sekretari i Përgjithshëm i NATO-s Jens Stoltenberg në vizitën e tij në Kosovë nëntorin e kaluar: ‘Stabiliteti në rajon varet nga të gjitha palët që zgjedhin diplomacinë në vend të dhunës dhe respektojnë detyrimet ekzistuese’”, kujton përgjigja.

Theksohet se “çdo vendosje e Forcave të Sigurisë së Kosovës në veri të Kosovës kërkon pëlqimin e KFOR-it”.

“Presim konsultime me kohë për çdo veprim të Forcave të Sigurisë së Kosovës apo Policisë së Kosovës që mund të ndikojë në sigurinë rajonale”, thuhet në përgjigje.