Elek: Qëllimi është që të ndërtojmë një QKS të fortë “Mitrovicë e Kosovës” me ndihmën e shtetit tone të Serbisë

Drejtori i Qendrës Klinike-Spitalore “Mitrovicë e Kosovës”, dr. Zlatan Elek, deklaroi mëngjesin e sotëm se të dy pacientët, të cilëve dje, për herë të parë në këtë institucion, iu implantua një legen artificial janë në gjendje stabile. Ai theksoi se më e rëndësishmja është që QKS, që nga dita e djeshme, është bërë pjesë e institucioneve shëndetësore të Serbisë që do të kontribuojnë në shkurtimin e listës së pritjes për implantimin e një legen artificial.

“Dje ishte një ditë historike për Qendrën tonë Klinike-Spiatlore, për shëndetësinë jo vetëm në Mitrovicën, por në të gjithë Kosovën dhe Metohinë. U operuan me sukses dy pacientë, të cilëve u janë implantuar endoproteza të legenit. Pas vizitës mjekësore të mëngjesit, parametrat e tyre jetësorë janë stabilë dhe sot, ose eventualisht nesër, do të transferohen në repartin e ortopedisë”, tha dr. Elek për RTS.

Ai theksoi se më e rëndësishmja është që Qendra Klinike-Spitalore “Mitrovicë”, që nga dita e djeshme, është renditur ndër institucionet shëndetësore të Republikës së Serbisë që do të marrin pjesë në shkurtimin e listës së pritjes për vendosjen e protezave artificiale të ijeve.

“Deri më tani, sipas evidencës sonë, kemi pasur rreth 42 pacientë. Pjesa më e madhe e tyre, rreth 30, janë operuar me sukses në institucione të tjera shëndetësore të Serbisë, jashtë Kosovës dhe Metohisë. Presim që në periudhën e ardhshme, falë bashkëpunimit të shkëlqyer me institucionet shëndetësore të nivelit terciar në Serbi, para së gjithash me QKS ‘Bezhanijska kosa’, shumë shpejt, pas rreth dhjetë ditësh, të vazhdojmë me operacionet për implantimin e një legen artificial”, tha dr. Elek.

Ai falënderoi drejtoreshën e QKS “Bezhanijska kosa”, Marija Zdravkoviq, dhe veçanërisht dr. Sllagjan Timotijeviq, shefin e repartit të ortopedisë në këtë institucion, i cili dje kreu me sukses dy ndërhyrje kirurgjikale.

“Kushtet për kryerjen e kësaj ndërhyrjeje kirurgjikale janë krijuar falë Qeverisë së Serbisë, Ministrisë së Shëndetësisë, Fondit Republikan të Sigurimeve Shëndetësore dhe Zyrës për Kosovë e Metohi. QKS ka kapacitetet, pajisjet më moderne dhe personelin e nevojshëm, para së gjithash falë investimeve të mëdha të shtetit gjatë 12-13 viteve të fundit”, theksoi dr. Elek.

Ai shpjegoi gjithashtu se të gjithë pacientët që janë referuar në qendra të tjera klinike-spitalore tani mund të paraqiten në QKS “Mitrovicë”, ku operacioni do t'u caktohet brenda një afati sa më të shkurtër.

Duke folur për mënyrën se si do të organizohet puna në të ardhmen, ai shpjegoi se ortopedët e QKS “Mitrovicë” kanë ndjekur trajnime te kolegët e tyre në QKS “Bezhanijska kosa” në Beograd. Ai shtoi se dje është arritur marrëveshja që dr. Timotijeviq të vazhdojë të vijë edhe në periudhën e ardhshme për të kryer operacionet e vendosjes së protezave artificiale të ijeve, ndërsa së shpejti këto ndërhyrje pritet të kryhen edhe nga vetë mjekët e QKS “Mitrovicë e Kosovës”.

Elek tha gjithashtu se, falë Qeverisë së Serbisë, Ministrisë së Shëndetësisë, Fondit Republikan të Sigurimeve Shëndetësore dhe Zyrës për Kosovë e Metohi, QKS “Mitrovicë” është pajisur edhe me një sallë angiografike të teknologjisë më moderne.

“Presim që të përfundojnë të gjitha procedurat e tenderimit, prokurimi i stentave dhe pajisjeve të tjera të nevojshme për kardiologjinë intervenuese. Kemi arritur marrëveshje për bashkëpunim me institucionet shëndetësore të nivelit terciar në Serbinë qendrore dhe pacientët më urgjentë që pësojnë infarkt nuk do të kenë më nevojë të udhëtojnë drejt institucioneve të tjera në Serbinë qendrore, por shumë shpejt, pres deri në fund të vitit, do të marrin ndihmën e nevojshme në sallën angiografike të teknologjisë më moderne në Mitrovicën e Kosovës”, tha dr. Elek.

Ai shtoi se gjatë dy viteve të fundit, specialistët e QKS “Mitrovicë” janë aftësuar për kryerjen e procedurave të tilla dhe se ato do t'i realizojnë së bashku me kolegët nga Serbia qendrore.

“Qëllimi është që, me ndihmën e shtetit të Serbisë, të ndërtojmë një qendër klinike-spitalore të fortë dhe të fuqishme, sepse shëndeti i qytetarëve nuk ka alternativë”, porositi dr. Elek.