Misini: Kufizimi i çmimeve të produkteve në kundërshtim me ekonomin e tregut të lirë

Profesori i ekonomisë Shkumbin Misini vlerësoi se kufizimi i çmimeve të produkteve është në kundërshtim me ekonomin e tregut të lirë dhe mund të zbatohet vetëm në rastet e fatkeqësive natyrore. Sipas tij, Qeveria e Kosovës duhet të heqë akcizën dhe taksën mbi vlerën e shtuar (TVSH) për karburantet nëse çmimi i naftës vazhdon të rritet.

"Ekonomia e tregut do të thotë vetërregullim i bazuar në ofertë dhe kërkesë. Kjo mund të zbatohet vetëm në rastet e fatkeqësive natyrore si tërmetet, ose gjatë një pandemie. Në kohën e koronavirusit, çmimi real i një maske ishte 25 cent ndërsa shiste për dy euro, kështu që në raste të tilla është e nevojshme", tha Misini.

Ai beson se ligji për kufizimin e çmimeve do të falimentojë shumë biznese të vogla dhe të mesme për shkak të kostove më të larta operative. Kompanitë e mëdha, nga ana tjetër, mund të përballojnë vendosjen e kufizimit të çmimeve.

Misini thotë se Qeveria e Kosovës, në vend që të kufizojë çmimet, mund të kontrollojë çmimet përmes akcizës dhe taksës mbi vlerën e shtuar për karburantet, të cilat duhet të hiqen nëse çmimi i naftës vazhdon të rritet.

"Kufizimi i çmimeve nuk është zgjidhja e duhur, përveç heqjes së akcizës. Pra, nëse çmimi i naftës vazhdon të rritet, atëherë duhet të hiqet edhe TVSH-ja, sepse inflacioni vazhdon të rritet. Disa ditë më parë vura re një rritje prej 20 përqind të çmimeve të mallrave të konsumit, dhe kjo shpjegohet me rritjen e çmimit të naftës. Në këto kushte, heqja e akcizës është e nevojshme. Nëse çmimi i naftës vazhdon të rritet përsëri, do të duhet të hiqet edhe TVSH-ja", tha Misini.