Arsiq: Sistemi i drejtësisë në Kosovë është i bllokuar nga qëndrimi se serbët janë fajtorë

Avokati Predrag Arsiq, i cili në Kosovë përfaqëson disa serbë të akuzuar, deklaroi, me rastin e raportit të OSBE-së, se aktakuzat për krime lufte në Kosovë kanë një domethënie krejtësisht tjetër dhe ngjajnë me njëra-tjetrën, ndërsa problemet e procedurave penale lidhur me krimet e luftës nuk janë as të vogla dhe as lehtësisht të zgjidhshme, transmeton RTS.

Arsiq theksoi se raporti i OSBE-së flet për disa përparime, por se, përveç mangësive të vetë procedurave penale – nga aktakuzat e paplota, dëshmitarët e rremë, deri te provat e falsifikuara mbi të cilat më pas bazohen edhe vetë aktgjykimet – nuk mund të thuhet se ka pasur ndonjë përmirësim në këto procese.

Ai shtoi se, po të ekzistonte një instancë ndërkombëtare që do të mbikëqyrte punën e sistemit të drejtësisë në Prishtinë, secila aktakuzë do t’i nënshtrohej një verifikimi serioz.

“Aktakuzat për krime lufte në Kosovë dhe Metohi kanë një domethënie krejtësisht tjetër dhe ngjajnë me njëra-tjetrën”, theksoi Arsiq.

Ai tha se vërejtjet e tij janë kryesisht të njëjta me ato që OSBE-ja ka paraqitur në raport, pasi ekziston një vazhdimësi në sistemin e drejtësisë së Prishtinës, ku vazhdohet me aktakuza të hartuara sipas të njëjtit model.

Arsiq, i cili edhe vetë ishte arrestuar në Gazimestan, tha se në rastin e tij personal është bindur se si funksionon, ose më saktë nuk funksionon, sistemi i drejtësisë. Ai theksoi se të arrestuarit në Gazimestan më 28 qershor, gjatë paraburgimit, nuk kishin të drejtat themelore – të merrnin ujë, të telefononin familjen, të kërkonin ndihmë mjekësore ose të kontaktonin mbrojtjen. Sipas tij, këto janë të drejta bazë të çdo personi të ndaluar, por përveç keqtrajtimit nga ana e policëve, nuk patën asgjë tjetër.

“Drejtësia shqiptare është e bllokuar nga qëndrimi i shoqërisë dhe komunitetit shqiptar se serbët janë fajtorë. Madje, ndonjëherë zhvillohet edhe një fushatë për të fituar pikë politike duke arrestuar një serb dhe duke e akuzuar atë për krime lufte”, tha Arsiq.