Fillipoviq: Shtatë drejtorët do të mbrohen në liri, procedura vazhdon sipas rrjedhës së saj

Avokatja Jovana Fillipoviq deklaroi se drejtorët e institucioneve arsimore dhe shëndetësore nga territori i komunës së Graçanicës janë liruar për t’u mbrojtur në liri, pasi Gjykata Themelore në Prishtinë vendosi që masën e paraburgimit ta zëvendësojë me masën e paraqitjes së detyrueshme në polici. Sipas këtij vendimi, ata do të jenë të detyruar të paraqiten në stacionin policor çdo të hënë dhe të premte.

“Sot, me vendim të Departamentit për Krime të Rënda të Gjykatës Themelore në Prishtinë, masa e paraburgimit e caktuar fillimisht për shtatë drejtorët nga zona e komunës së Graçanicës është zëvendësuar me masën e paraqitjes në stacionin policor. Ky vendim do të thotë se ata janë liruar sot për t’u mbrojtur në liri”, tha Fillipoviq, e cila në këtë procedurë përfaqëson drejtoreshën e Shtëpisë së Shëndetit në Graçanicë, Mirjana Dimitrijeviq.

Sikurse theksoi se ata do të jenë të detyruar të paraqiten në stacionin policor çdo të hënë dhe të premte në orën 10:00.

“Ata do të mbrohen në liri në vazhdim. Procedura vazhdon sipas rrjedhës së saj, por në çdo rast është një lajm i mirë që ata janë liruar nga paraburgimi”, tha Fillipoviq.

Sipas saj, masa e paraburgimit po caktohet tepër ashpër, për çka avokatët kishin paralajmëruar vazhdimisht.

“Ne kemi theksuar disa herë se masa e paraburgimit po caktohet tepër ashpër pothuajse në të gjitha rastet. Sa herë që prokuroria e ka kërkuar, në shumicën e rasteve ajo është aprovuar. Ne kemi argumentuar se kjo masë nuk ishte adekuate dhe se qëllimi mund të ishte arritur me ndonjë masë tjetër më të butë. Fatkeqësisht, në atë moment gjykata nuk i mori parasysh apelimet tona, por më vonë, pas dëgjimit të tyre, u mor ky vendim që përmenda. Shpresoj që në të ardhmen edhe gjykatat, edhe prokuroritë do t’i kushtojnë më shumë vëmendje mënyrës se si caktohet kjo masë tepër e ashpër”, theksoi Fillipoviq.

Paraburgimi është hequr për drejtorin e Qendrës Spitalore-Klinike të Prishtinës me seli në Graçanicë, Bratisllav Llaziq, drejtoreshën e Qendrës Shëndetësore në Graçanicë, Mirjana Dimitrijeviq, drejtorin e  Qendrës Shëndetësore në Gushtericë e Poshtme, Sasha Mlladenoviq, drejtoreshën e Shkollës Fillore “Braća Aksić” në Lipjan, Millica Dimiq, drejtorin e Shkollës Fillore “Miladin Mitić” në Llapllasellë, Ljubisha Karagjiq, drejtorin e Shkollës së Makinerisë në Preoc, Nebojsha Rashiq, dhe drejtorin e Shkollës Elektroteknike në Sushicë, Boban Petroviq.

Shtatë drejtorët u ndaluan më 19 maj nën dyshimin se kishin kryer veprën penale “cenim i lirisë së përcaktimit të votuesve”.

Më 21 maj, Gjykata Themelore në Prishtinë u kishte caktuar masën e paraburgimit deri në 30 ditë.

Kolegët e tyre, të punësuar në institucionet arsimore dhe shëndetësore në Kosovën qendrore, kanë protestuar çdo ditë që nga momenti i arrestimit të tyre, duke kërkuar lirimin e tyre.