U hoq masa e paraburgimit për shtatë drejtorë të institucioneve arsimore dhe shëndetësore nga Graçanica

Gjykata Themelore në Prishtinë ka hequr masën e paraburgimit për drejtorët e institucioneve arsimore dhe shëndetësore nga territori i komunës së Graçanicës, të cilët u arrestuan më 19 maj, dhe e ka zëvendësuar atë me masën e paraqitjes së detyrueshme në polici, konfirmoi për Kosovo online avokati Bogdan Llaziq, mbrojtësi i drejtorit të Shkollës së Makinerisë, Nebojsha Rashiq.

Gjykata hoqi paraburgimin për drejtorin e Qendrës Spitalore-Klinike të Prishtinës me seli në Graçanicë, Bratisllav Llaziq, drejtoreshën e Qendrës Shëndetësore në Graçanicë, Mirjana Dimitrijeviq, drejtorin e  Qendrës Shëndetësore në Gushtericë e Poshtme, Sasha Mlladenoviq, drejtoreshën e Shkollës Fillore “Braća Aksić” në Lipjan, Millica Dimiq, drejtorin e Shkollës Fillore “Miladin Mitić” në Llapllasellë, Ljubisha Karagjiq, drejtorin e Shkollës së Makinerisë në Preoc, Nebojsha Rashiq, dhe drejtorin e Shkollës Elektroteknike në Sushicë, Boban Petroviq.

Shtatë drejtorët u ndaluan më 19 maj nën dyshimin se kishin kryer veprën penale “cenim i lirisë së përcaktimit të votuesve”.

Më 21 maj, Gjykata Themelore në Prishtinë u kishte caktuar masën e paraburgimit deri në 30 ditë.

Kolegët e tyre, të punësuar në institucionet arsimore dhe shëndetësore në Kosovën qendrore, kanë protestuar çdo ditë që nga momenti i arrestimit të tyre, duke kërkuar lirimin e tyre.