Andriq Rakiq për gjysmëvjetorin e mandatit të kryekomunarëve shqiptarë: Komunat funksionojnë me vështirësi, situata është përkeqësuar

Në gjashtë muajt e fundit të mandatit të kryetarëve jolegjitimë shqiptarë, të zgjedhur në zgjedhjet e prillit të bojkotuara nga serbët, situata në komunat e veriut është përkeqësuar shumë, sepse është dukshëm më e vështirë për qytetarët që të kenë qasje në shërbime të ndryshme, thotë Millica Andriq Rakiq, menaxhere e programit të organizatës joqeveritare Nisma e Re Sociale nga Kosova.

Duke folur për efektet e punës gjysmëvjeçare të autoriteteve të reja lokale në katër komunat veriore me shumicë serbe, Andriq Rakiq për Kosovo online tregon se nuk ka ndryshime të rëndësishme.

“I vetmi që ka paralajmëruar vendime potencialisht problematike ka qenë kryetari i Mitrovicës së Veriut, Erden Atiq. Ai nuk i zbatoi ato vendime në fund. Sa i përket shërbimeve, gjendja është shumë e keqe, me përjashtim të Mitrovicës së Veriut, në komunat tjera nuk mund të merren shërbime as nga sistemi serb dhe as nga sistemi kosovar. Në fakt, gjithçka është zhvendosur në vende alternative, të dy sistemet, dhe në këtë kuptim, është dukshëm më e vështirë për qytetarët që të kenë qasje në shërbime, dhe tani ata duhet të shkojnë në disa lokacione për të përfunduar një çështje administrative. Nga aspekti i shërbimeve, situata është përkeqësuar shumë, ndërsa nga aspekti politik nuk mund të flitet për disa vendime politike që bënë një ndryshim të rëndësishëm në terren. Ka pasur njoftime për vendime të shumta, por shumica e tyre në fund nuk u realizuan”, tha ajo.

Andriq Rakiq kujtoi funksionimin e vështirë të institucioneve që nga marrja e mandateve nga kryekomunarët e rinj.

“Shumica e shërbimeve të ofruara nëpër komuna, sa i përket pastrimit dhe shërbimeve të tjera të qytetit, ofrohen nga ndërmarrjet publike të sistemit serb, ne nuk mund të shohim shumë nga efektet e atyre institucioneve nga sistemi i Kosovës. Ndërmarrjet publike nga sistemi serb kanë disa kufizime në punën e tyre, kemi edhe raste të pezullimit të ndërtimit të objekteve të caktuara. E bën atë që duhet të bëjë, e bën me gjysmë fuqie dhe ndoshta më pak se kaq. Mund ta ndjeni vërtet dhe ta shihni kur keni nevojë të rregulloni rrugët ose diçka të tillë. Ka një moment hezitimi kur me siguri institucionet serbe nuk janë të sigurta nëse duhet të reagojnë, dhe ato kosovare nuk e kanë atë kapacitet. Shihet se nuk ka më atë lloj koordinimi që ekzistonte më parë”, thekson Andriq Rakiq.

Për shkak të përshtypjes se çështja e zgjedhjeve të reja në katër komuna në veri ka rënë në plan të dytë, bashkëbiseduesja jonë thotë se ato janë ende kusht kyç i bashkësisë ndërkombëtare dhe për këtë arsye nuk janë hequr masat ndëshkuese që BE ka vendosur në Kosovë.

“Ka ende mesazhe nga komuniteti ndërkombëtar se preferojnë dorëheqjen e kryekomunarëve, jo peticionin, por mendoj se tani të gjithë e kuptojnë, duke pasur parasysh zgjedhjet në Serbi, se nuk do të ketë përparim të dukshëm në dialog për një kohë të gjatë, kështu që tani të gjithë po tërhiqen pak në atë kuptim. Po ashtu, sezoni i festave po vjen, shumica e njerëzve do të jenë me pushime dhe realisht nuk mund të presim llojin e presioneve që kanë ekzistuar deri më tani dhe vizita të shpeshta nga përfaqësues të bashkësisë ndërkombëtare para mesit të janarit. Në përgjithësi, situata në botë po ndërlikohet, shumë pika të nxehta e largojnë vëmendjen nga Ballkani”, tha Adriq Rakiq.