Avokatët e pesë serbëve: Përpjekje për t’u atribuar faj kolektiv, kemi frikë se paraburgimi megjithatë do të caktohet

Avokatët e pesë serbëve që u arrestuan sot nga Policia e Kosovës në komunat e Shtërpcës dhe Gjilanit theksuan se në seancën e sotme për caktimin e paraburgimit kanë kundërshtuar kërkesën e prokurorisë, duke vlerësuar se bëhet fjalë për një tjetër përpjekje për t’u atribuar faj kolektiv. Megjithatë, siç shtuan ata, kanë frikë se masa e paraburgimit do të caktohet gjithsesi.

Avokati Nebojsha Vlajiq, i cili mbron Novica Peçinoqeviqin, tha se mbrojtja e kundërshtoi kërkesën e prokurorisë për caktimin e paraburgimit.

“Ne sot kundërshtuam kërkesën e prokurorit publik për caktimin e paraburgimit ndaj pesë serbëve të arrestuar nga Kosova. Sipas bindjes sime të thellë, ky është edhe një rast tjetër i përpjekjes për t’u atribuar faj kolektiv, ku njerëzit e pafajshëm bëhen përgjegjës për diçka vetëm për shkak të përkatësisë së tyre ndaj një grupi ose për shkak të profesionit të tyre policor para luftës. Kjo nuk mund të jetë kështu dhe jam i sigurt se gjatë procedurës do ta dëshmojmë këtë, por problemi është se ekziston një mundësi e madhe që paraburgimi t’u caktohet megjithatë”, tha Vlajiq.

Mbrojtësi i Stanoje Janiqeviqit, avokati Lubomir Pantoviq, tha se prokurori nuk e ka arsyetuar në mënyrë të saktë dyshimin e bazuar dhe fajësinë individuale si bazë për caktimin e paraburgimit.

“Po ndodh ajo që e kemi parë prej vitesh kur bëhet fjalë për caktimin e paraburgimit. Edhe pse bëhet fjalë për një vepër penale shumë serioze, krim lufte kundër popullatës civile, ku prokurori është i detyruar të shpjegojë qartë dhe saktë dyshimin e bazuar si arsyen kryesore për paraburgim, këtu kemi një situatë ku ai, si të thuash, i fut të gjitha në një thes dhe për të pestët nuk jep asgjë konkrete, përkatësisht çfarë ka bërë secili prej tyre dhe ndaj kujt ekziston dyshimi i bazuar. Gjithçka është e përgjithësuar, e përshkruar në vija të përgjithshme dhe në shumës: kanë ardhur, kanë hyrë, kanë qëlluar e kështu me radhë. E gjithë kjo është jashtë ligjit, por unë nuk jam optimist. Kam frikë se, pavarësisht se procedura dhe seanca e sotme janë zhvilluar në kundërshtim me ligjin, sikurse edhe vetë kërkesa e prokurorit, paraburgimi do të caktohet megjithatë”, tha Pantoviq.

Avokati i Stanko Saviqit nga Gjilani, Millosh Nikolliq, theksoi se gjykatës i ka dorëzuar një vendim që tregon se klienti i tij nuk iu përgjigj thirrjes për mobilizim gjatë periudhës së konfliktit në Kosovë dhe se bëhet fjalë për një ngatërrim identiteti.

“Konsideroj se nuk ekziston absolutisht asnjë bazë për caktimin e paraburgimit dhe as për dyshimin e bazuar kundër tij. Madje, në kërkesën e prokurorisë, me qëllim ose gabimisht, identiteti i tij është shënuar gabim, duke u thënë se para luftës ka punuar në Stacionin Policor në Ferizaj. Ky njeri që nga viti 1990 punon në Postën e Serbisë dhe vazhdon të punojë aty edhe sot. Ai nuk ka qenë i mobilizuar. Sot i dorëzova gjykatës një vendim nga i cili shihet se nuk iu përgjigj thirrjes për mobilizim dhe se për këtë arsye në vitin 1999 është dënuar me 15 ditë burg, pikërisht në periudhën që përmendet si koha e kryerjes së kësaj vepre penale. Gjithashtu, sikurse kolegët e mi, nuk jam optimist sa i përket mundësisë që ai të mbrohet në liri”, tha Nikolliq.