Daçiq: Përfaqësuesit e bashkësisë ndërkombëtare besojnë se problemi më i madh është Kurti

Ministri i Punëve të Jashtme të Republikës së Serbisë, Ivica Daçiq, ka deklaruar se nuk është befasuar nga deklarata e përfaqësuesit special të SHBA-së për Ballkanin Perëndimor, Gabriel Escobar, për KKS-në dhe se ky qëndrim është përsëritur për një kohë të gjatë, raporton TV Happy.

Daçiq theksoi se qasja e SHBA-së ndaj kësaj çështjeje është shumë korrekte dhe shtoi se disa përfaqësues evropianë nuk janë aq të fortë në këtë çështje.

“Eskobar përdori formulimin për Marrëveshjen e Brukselit, i cili është në favorin tonë. Ai tha se marrëveshja ishte ligjërisht e detyrueshme. Disa përfaqësues të tjerë evropianë nuk janë aq të rreptë për këtë çështje. Berbok më tha se asnjë kryeministër i Kosovës nuk do ta pranojë formimin e Komunitetit të Komunave Serbe. Megjithatë, kur u nënshkrua marrëveshja e Brukselit, kryeministër ishte Hashim Thaçi. E ka nënshkruar ai. Paradoksi është se për disa ka marrëveshje të Brukselit dhe për disa jo. Presidenti Vuçiq renditi të gjitha marrëveshjet ndërkombëtare dhe pyeti se cila marrëveshje ishte e pranueshme për ta. Është e qartë se Prishtina nuk dëshiron që asgjë të respektohet dhe pikërisht këtu vihet në pikëpyetje vazhdimi i dialogut. Rezoluta 1244 përmendet në dokumentet e Samitit të Selanikut. Të gjitha pretendimet se marrëveshjet dhe rezolutat nuk janë aktuale, janë në funksion të inkurajimit të Kurtit për të mos pranuar asgjë dhe për të vazhduar agjendën e tij. Në ditët në vijim do të punohet për depërshkallëzimin, dhe vetëm atëherë mund të flasim për tema më serioze që bazohen në Marrëveshjen e Brukselit”, ka thënë ministri Daçiq në emisionin “Mirëmëngjes Serbi”.

Daçiq ka komentuar qëndrimin e bashkësisë ndërkombëtare lidhur me kthimin e serbëve të Kosovës në institucionet e Kosovës.

“Nuk është aspak një situatë e thjeshtë. Serbët nuk kanë ku dhe nuk kanë se si të kthehen në institucione. Përfaqësuesit e Bashkësisë Ndërkombëtare kanë deklaruar se problemi më i madh për momentin është Kurti. Ata besojnë se derisa të jetë Kurti në pushtet, nuk do të ketë asgjë për të respektuar Marrëveshjen e Brukselit”, tha Daçiq.

Ministri ka thënë se është e pasigurt se çfarë do të ndodhë me Kosovën pas aplikimit për anëtarësim në BE-në.

“Szijarto personalisht më ka premtuar se do të votojë kundër tij! Çështja është nëse do të ketë votim fare apo Republika Çeke kryesuese do ta kërkojë si çështje procedurale”, ka thënë Daçiq
Daçiq tha se Serbia duhet të udhëheqë një politikë të jashtme të balancuar dhe të bazuar në parimet e ligjit ndërkombëtar.

“Çështja e harmonizimit me BE-në nuk është vetëm një çështje e lidhur me Rusinë.

Populli ynë është i neveritur kur dikush flet për sanksione. Ne vetë ishim viktima të sanksioneve. Këtu e kam fjalën për interesa politike. Është shumë e rëndësishme se si do të votojë në forumet ndërkombëtare. Nuk ka vlerë që kemi shtete që nuk e kanë njohur Kosovën kur nuk e kanë votuar. Nëse do të vendosnim sanksione ndaj Rusisë, a do të thoshte kjo se Kosova nuk do të hynte në OKB-në? Sigurisht që nuk do të thotë. Asgjë nuk do të ndryshonte nëse do të vendosnim sanksione ndaj Rusisë, përveç se do të humbnim votat në të cilat mund të mbështetemi. Prandaj, vendimet tona janë sovrane dhe ne i marrim pa marrë parasysh presionin nga të dyja palët”, tha Daçiq.

Ai përmendi edhe një herë se për të zgjidhur krizën aktuale në Kosovë, më e rëndësishme është ndalimi i përshkallëzimit të mëtejmë të dhunës.

“Sot është seanca e Këshillit Evropian, të gjithë liderët e BE-së janë në atë takim dhe sigurisht që do të diskutohet për situatën në Kosovë. Lajçaku dhe Borelli sigurisht që do të informojnë për atë që po ndodh”, ka përfunduar Daçiq.