Daçiq: S’do të lejojmë viktima serbe për shkak të mosgatishmërisë së bashkësisë ndërkombëtare

Shefi i diplomacisë serbe, Ivica Daçiq, ka thënë për RTS se prej muajsh jemi në një përshkallëzim për shkak të sjelljes së papërgjegjshme të Albin Kurtit, e cila po shkakton situata konflikti.

Duke komentuar ardhjen e KFOR-it para ndërtesave komunale në veri të Kosovës, Daçiq tha se detyra e KFOR-it ka qenë të parandalojë aktin e njëanshëm të Prishtinës dhe jo të pengojë hyrjen e punonjësve në ndërtesa.

“Tani po i mbrojnë kryetarët me pretekstin e ruajtjes së paqes. Duket se po i mbrojnë nga pronarët e objekteve, serbët, nga ata që punojnë atje, që janë të punësuar atje. Ata nuk mund të jenë kryetarë komunash në komunat serbe, të cilët serbët nuk i kanë zgjedhur”, tha Daçiq.

Ai ka theksuar se forcat e armatosura të Serbisë janë në gjendje gatishmërie.

“S’do të lejojmë viktima serbe për shkak të mosgatishmërisë së bashkësisë ndërkombëtare dhe aventurizmit luftarak të Kurtit”, tha Daçiq.