Departamenti i Shtetit: Dialogu strategjik pasqyron një epokë të re në marrëdhëniet SHBA-Serbi

Dialogu strategjik i nisur nga Shtetet e Bashkuara të Amerikës dhe Serbia pasqyron një epokë të re të marrëdhënieve midis dy vendeve dhe është një shenjë e angazhimit për thellimin e partneritetit, njoftuan nga  Departamenti i Shtetit për Kosovo online.

Në deklaratë, kujtohet se Sekretari i Shtetit i SHBA-së, Marco Rubio, njoftoi më 6 gusht se Shtetet e Bashkuara do të zhvillojnë dialogun e parë strategjik me Serbinë.

"Ky dialog strategjik pasqyron një epokë të re të marrëdhënieve midis SHBA-së dhe Serbisë. Është një shenjë e angazhimit të të dy vendeve për të zgjeruar dhe thelluar partneritetin tonë", thanë nga Departamenti i Shtetit.

Ata shtojnë se përmes dialogut, Shtetet e Bashkuara dhe Serbia do të punojnë drejt qëllimeve të përbashkëta, duke përfshirë paqen dhe stabilitetin rajonal, lidhjet e zgjeruara të biznesit dhe arsimit, dhe ndërtimin e një të ardhmeje më të begatë.

Seanca e parë brenda dialogut strategjik midis Serbisë dhe SHBA-së do të mbahet nesër në Uashington.