Doniq: Çështja e BKS-së dhe vazhdimi i dialogut do të presin harmonizimin e SHBA-së dhe BE-së

Bashkëpunëtori i Rrugës së Tretë të Re, Petar Doniq, deklaroi se çështja e formimit të Bashkësisë së Komunave Serbe është në prioritetet e SHBA-së dhe BE-së, por se vetëm pas zgjedhjes së ambasadorëve amerikanë në Beograd dhe Prishtinë dhe të dërguarve të posaçëm për Ballkanin Perëndimor do të jetë më e qartë se në cilin drejtim do të zhvillohet procesi i normalizimit. Ai thekson se ndërprerja e dialogut në një situatë të tillë do të ishte e gabuar për interesat serbe.

"Sa herë që nuk ka pasur dialog, situata ka ndryshuar, është përkeqësuar kundër interesave serbe, kështu që ndërprerja e dialogut me siguri do të rezultonte në një pozicion më të keq. Sa herë që ka pasur dialog, ka qenë mirë. E kemi parë se Marrëveshja e Ohrit e ka revitalizuar dialogun. Dialogu është i rëndësishëm dhe duhet të vazhdojë", tha Doniq për Kosovo online.

Ish-ambasadori amerikan në Beograd, Uilliam Montgomeri, deklaroi në podcastin e Kosovo online se, nëse do të merrej me çështjen e Kosovës, do të insistonte në formimin e Bashkësisë së Komunave Serbe dhe do ta kushtëzonte vazhdimin e dialogut me këtë çështje.

Doniq thotë se nuk ka dilemë që formimi i Bashkësisë së Komunave Serbe është një "çështje shumë e rëndësishme" për administratën amerikane, pasi përbën shtyllën kryesore të normalizimit të ardhshëm të marrëdhënieve mes Prishtinës dhe Beogradit.

"Çështja e Bshkësisë së Komunave Serbe ka qenë prioritet për administratën e kaluar, atë para saj dhe për këtë administratë aktuale. Kjo është një çështje shumë e rëndësishme për ta. Ajo është pjesë e një konteksti më të gjerë të politikës dhe shtetit amerikan, si dhe të Evropës, e cila vazhdon strategjinë dhe politikën e saj për të afruar të dyja palët," tha Doniq.

Shumë do të varet nga “pozicionimi” i mëtejshëm i BE-së, por edhe nga emërimi i ambasadorëve të rinj të SHBA-së në Beograd dhe Prishtinë dhe një të dërguari special për Ballkanin Perëndimor.

"Evropa është ende në rrugën e saj për t'u bërë një "lojtar" më i madh, një faktor, dhe në këtë kontekst ajo po përpiqet të ruajë dhe të rrisë pozicionin e saj. Nga ana tjetër, Amerika ende luan një rol të madh. Gjatë mandatit të parë të Donald Trump, ne patëm një afrim të madh, ndonëse në aspektin ekonomik. Trump ende nuk ka emëruar asnjë nga lojtarët kryesorë në Ballkanin Perëndimor. Ne nuk kemi ambasadorë, nuk kemi të dërguar specialë kështu që është ende herët për të parë nëse do të ketë një lloj ndryshimi apo një lloj ndryshimi i dinamikës, përshpejtim derisa të zgjidhen ata të dërguar specialë dhe ambasadorë. Tani kemi shumë deklarata, por asnjë aktivitet”, ka shpjeguar Doniq.