Eskobar pas takimit me Kurtin: Çështja e dinarit - çështje urgjente humanitare që duhet zgjidhur menjëherë

I dërguari special i SHBA-së për Ballkanin Perëndimor, Gabriel Eskobar, pas takimit me kryeministrin e Kosovës, Albin Kurti, tha se çështja e dinarit është një çështje urgjente, humanitare që duhet zgjidhur menjëherë. Ai paralajmëroi raundin e radhës të dialogut në Bruksel për të martën dhe vlerësoi qeverinë për vendimin e saj në lidhje me manastirin e Deçanit.

"Ne patëm një bisedë shumë të hapur. SHBA mbetet një partner i përkushtuar i Kosovës, por duhet të theksoj se marrëdhëniet tona po kalojnë nëpër sfida të caktuara, të cilat janë shkaktuar nga qëndrimi ndaj minoritetit serb", tha Eskobar në një deklaratë për gazetarët.

Ai ka theksuar se vendimi i Bankës Qendrore të Kosovës për ndalimin e dinarit ka shkaktuar vështirësi për komunitete të caktuara në Kosovë, për këtë arsye SHBA-të janë shumë të shqetësuara.

“Do të vazhdojmë të punojmë për këtë çështje, por mendoj se kjo është një çështje urgjente humanitare që duhet të zgjidhet menjëherë. Shpresoj që qeveria të jetë e gatshme të jetë fleksibël në vazhdimin e dialogut, i cili është planifikuar për të martën”, tha Eskobar.

Ai tha se e ka lavdëruar Kurtin për vendimin që ka marrë në lidhje me manastirin e Deçanit.

"Ishte një vendim i vështirë, por korrekt. Përgëzoj angazhimin e tij për zbatimin e shtetit ligjor dhe vendimin e marrë nga Gjykata Kushtetuese", tha Eskobar.

Siç ka thënë ai, në takim ka theksuar qartë se askush nuk po i dëgjon më të cenuarit, pra pensionistët dhe studentët.

“Kryeministri e mori parasysh këtë dhe premtoi se do të merrte në konsideratë propozimet që paraqita sot”, shtoi Eskobar.

Sipas tij, raporti i SHBA-së ndaj Kosovës nuk është i pabalancuar.

“Gjithçka që bëmë vitin e kaluar – e bëmë për Kosovën. Fill pas Ohrit, ne e mbështetëm kandidaturën e Prishtinës për Këshillin e Evropës, dhe proceset demokratike, përfshirë zgjedhjet në veri. I qëndruam përkrah Kosovës pas ngjarjeve të shtatorit dhe arritëm deri në atë pikë që t'ju sigurojmë 'Javelins'. Pra, na shpjegoni se si kjo është një marrëdhënie e pabalancuar”, përfundoi Eskobar.