Gariq: Kurti po udhëheq politikë konflikti, Serbia do të arrijë një zgjidhje vetëm përmes bisedimeve të vështira me përfaqësuesit e Perëndimit

Ardhja e pesë përfaqësuesve specialë të vendeve më të rëndësishme perëndimore në Beograd flet për rëndësinë që ata i kushtojnë aktualisht rajonit tonë, natyrisht që, për shkak të synimeve të tyre, është një presion i ri i fortë ndaj Serbisë, por në të njëjtën kohë është një mënyrë që Presidenti Vuçiq t'i paraqesë argumentet dhe qëndrimet tona në kontakt të drejtpërdrejtë me aktorët kryesore, thotë redaktori i portalit Kosovo Online, Millosh Gariq, në një intervistë për RTS.

Gariq ka theksuar se në takime të tilla, përkundër faktit se janë shumë të vështira, Serbia ka një mundësi të paraqesë argumente të bazuara në parimet e së drejtës ndërkombëtare.

"Nuk ka bisedime me Prishtinën dhe shqiptarët në këtë moment. Nuk mund të pajtohesh për asgjë me Kurtin dhe të supozosh se do të respektohet. Serbia dëshiron bisedë dhe refuzon çdo mundësi tjetër përveç dialogut, edhe pse Prishtina insiston në armiqësi, përpiqet ta përfshijë Serbinë në konflikte nga të cilat Kurti do të donte të përfitonte dhe të fitonte një argument kyç në arritjen e qëllimeve të tij”, theksoi Gariq.

Gariq theksoi se përfaqësuesit e huaj vijnë në Beograd me presion serioz, por se Serbia mbron parimet universale të së drejtës ndërkombëtare.

“Nën udhëheqjen e Alleksandër Vuçiqit, Serbia ka ndërtuar një imazh dhe njihet si një shtet i besueshëm, i qëndrueshëm që mban fjalën, që përmbush atë që është rënë dakord dhe nënshkruar. Është e vetmja rrugë e mundshme që hap mundësinë për zgjidhje pozitive. Jetojmë në një botë padrejtësie, por ka një çarje nëpër të cilën mund të kalojmë nëse këmbëngulim me një politikë të tillë”, theksoi Gariq.

Ai shtoi se Prishtina edhe këto ditë po kryen provokime të reja, po përpiqet t'i privojë serbët nga e drejta për të vozitur veturat e tyre me targa KM përkundër marrëveshjes në Bruksel nga nëntori i kaluar.

“Prandaj është mirë se si reagoi këshilltari i lartë i Departamentit të Shtetit, Derek Sholle, i cili menjëherë e paralajmëroi qartë Prishtinën dhe nënvizoi se ky është një devijim nga marrëveshja dhe se nuk mund të jetë një mënyrë për të arritur ndonjë zgjidhje”, thekson Gariq.

Nga ana tjetër, ai tregon se nga Gjermania vjen mbështetja e plotë për Albin Kurtin dhe ekstremizmin e tij.

“Kjo mund të shihet përmes deklaratave të të dërguarit për Ballkanin Perëndimor, Manuel Zaracin, si dhe deputetit Adis Ahmetoviq nga SPD që është në pushtet, i cili sulmon Beogradin me gënjeshtra, flet për një Serbi të madhe, se Beogradi shkakton konflikte, dhe në të njëjtën kohë mbron çdo gjë që Prishtina bën dhe nuk kujtohet të thotë se programi i partisë Vetëvendosje të Kurtit synon që të krijojë një Shqipëri të madhe”, theksoi Gariq.

Ai theksoi se përderisa ekziston një situatë e tillë, BE-ja do të jetë gjithnjë e më larg Serbisë dhe jo për fajin e Beogradit.

Gariq shtoi se është e qartë se për momentin ka një krizë të madhe në të gjithë botën, si dhe se BE-ja po i mbijeton një krizë të brendshme.

"Ata hoqën dorë nga parimet e tyre. Ata udhëheqin një politikë që nuk përfshin mundësinë e zgjerimit, është problem i veçantë në Ballkanin Perëndimor. Kjo është aq e theksuar sa nuk mund të presim që të hyjmë në BE në vitet e ardhshme. Lëvizjet që Brukseli po bën në raport me Kosovën, në raport me Serbinë, por edhe me Bosnjën dhe Hercegovinën, na distancojnë nga Bashkimi”, ka theksuar Gariq.

Në përgjigje të deklaratës së Presidentit Vuçiq se në Samitin e Davosit u tregua një mendje e vetme, Gariq u pajtua dhe tha se një mendje e vetme është karakteristikë e sistemeve totalitare, fashizmit dhe komunizmit dhe se nuk mund të pritej që Perëndimi të rrëshqiste në të.

"Serbia, me qasjen e saj të pavarur, duke këmbëngulur që të marrë vendimet e veta dhe duke mbrojtur parimet universale të së drejtës ndërkombëtare, nuk përshtatet në një politikë të tillë perëndimore dhe kjo sjell me vete rreziqe dhe pasoja. Prandaj presionet janë kaq të mëdha", nënvizoi Gariq.