Gecaj: Stërvitjet e përbashkëta të FSK-së dhe ushtrisë së Shqipërisë janë të harmonizuara me standardet e NATO-s

Eksperti i sigurisë nga Prishtina, Hysen Gecaj, thotë se, ndonëse FSK-ja bashkëpunon ngushtë me shumë vende, bashkëpunimi ushtarak me Shqipërinë është më i rëndësishëm dhe më specifik, pasi komunikimi është më i lehtë për shkak se të dyja palët flasin gjuhën shqipe, dhe gjithashtu sepse poligonet ku mbahen ushtrimet janë afër, çka ul kostot.

„Ata bashkëpunojnë në mënyra të ndryshme. Zakonisht bëhen stërvitje të përbashkëta që mbahen në territorin e njërës apo tjetrës palë, si dhe shkollime të përbashkëta të kadetëve. Aktualisht FSK-ja ka disa kadetë që po studiojnë në akademinë ushtarake të Shqipërisë, dhe ata mund të sjellin këtu kadetët e tyre për të përfituar përvoja dhe njohuri të reja për mënyrën se si funksionon gjithçka në Kosovë“, deklaroi Gecaj për Kosovo online.

Qëllimi i këtij bashkëpunimi, siç thotë ai, është që të harmonizohen mënyrat e veprimit, komandimit dhe përgatitjes së oficerëve, duke filluar nga shtabet bazë deri te nivelet më të larta.

„Kjo e lehtëson bashkëpunimin eventual të dy ushtrive nëse një ditë do të ndodhte të kishin nevojë të vepronin së bashku në fushëbetejë“, thekson Gecaj.

Për FSK-në, siç thotë ai, është lehtësim fakti që Shqipëria është afër, dhe që mësimi dhe gjithçka tjetër zhvillohet në gjuhën shqipe, ndërsa terenet për ushtrime janë të përshtatura për situata të caktuara, dhe kombinimi i poligoneve stërvitore, sipas tij, është shumë i rëndësishëm si për Shqipërinë ashtu edhe për Kosovën.

„Ata, për shembull, mund të përdorin në Kosovë poligonin Babaj Bokës afër Gjakovës, ndërsa Kosova mund të përdorë poligonet në Shqipëri të cilat janë shumë më të mëdha dhe kanë më shumë hapësirë për përdorime të tjera, për shembull për artileri“, thekson Gecaj.

Të gjitha stërvitjet që zhvillohen së bashku dhe njohuritë shkencore që fitohen nga këto marrëdhënie, siç thekson ai, janë të harmonizuara me standardet e NATO-s, dhe në këtë drejtim, FSK përfiton nga bashkëpunimi me ushtrinë shqiptare, e cila është pjesë e NATO-s dhe që i njeh këto standarde më shumë dhe më mirë sesa FSK.

"Kohët e fundit, FSK ka arritur një nivel të lakmueshëm. Nënoficerët, oficerët, ushtarët i kanë kuptuar këto standarde dhe tani e kryejnë punën e tyre të përditshme në të njëjtën mënyrë siç e bëjnë ushtritë e NATO-s, të gjitha vendet evropiane që janë anëtare të NATO-s dhe SHBA-të", thotë ky ekspert i sigurisë.

Kosova, shton ai, bashkëpunon jo vetëm me Shqipërinë, por ka edhe bashkëpunim të ngushtë ushtarak me vende të tjera si SHBA-të, Gjermania dhe Britania e Madhe. Në një shkallë më të vogël dhe në një nivel më të ulët, ka bashkëpunim me Maqedoninë e Veriut, e cila gjithashtu shkollon disa kadetë nga Kosova, si dhe Turqinë dhe shumë vende të tjera.