Ambasada e Britanisë së Madhe: Koordinim pozitiv i KFOR dhe FSK në operacionin e kërkimit në Ujman

Ambasada Britanike në Kosovë vlerësoi si pozitiv koordinimin midis KFOR-it dhe Forcave të Sigurisë së Kosovës, pasi komandanti i KFOR-it miratoi angazhimin e ekipeve të kërkim-shpëtimit të FSK-së për të kërkuar trupin e Rahim Latifit, i cili u mbyt disa ditë më parë në Liqenin e Ujmanit pasi u hodh nga një urë.

Në një deklaratë të publikuar në Facebook, Ambasada deklaron se ky operacion është një provë e aftësive të jashtëzakonshme të FSK-së në kërkim-shpëtim, dhe se është në përputhje me marrëveshjet afatgjata midis KFOR-it dhe FSK-së.

"Ne e përgëzojmë KFOR-in për ofrimin e mbështetjes dhe sigurisë gjatë gjithë operacionit", thuhet në deklaratë.

Ambasada shprehu ngushëllimet e saj familjes së të riut që humbi jetën.

"Mbretëria e Bashkuar mbështet plotësisht misionin e KFOR-it në kontributin për një mjedis të sigurt për të gjithë njerëzit dhe komunitetet në Kosovë. Bashkëpunimi i ngushtë midis KFOR-it, FSK-së dhe aktorëve të tjerë të sigurisë, përfshirë Policinë e Kosovës dhe EULEX-in, që është çelësi i suksesit të misionit të KFOR-it", përfundon deklarata.