Gjuriq: Konferenca në Riad është një mundësi e shkëlqyer për prezantimin e Serbisë

Ministri i Punëve të Jashtme të Serbisë, Marko Gjuriq, deklaroi sot se pjesëmarrja e Serbisë në Konferencën për Iniciativat dhe Investimet e së Ardhmes në Riad, e cila mbledh më shumë se 40 liderë botërorë dhe figura kryesore nga fusha e shkencës, teknologjisë dhe biznesit, është një mënyrë që Serbia të ndjekë hapat e trendeve më bashkëkohore, si në fushën e ekonomisë dhe gjeopolitikës, ashtu edhe të inteligjencës artificiale.

Gjuriq tha se inteligjenca artificiale është një nga temat kryesore të konferencës në Riad, pasi të gjithë po mendojnë se si ta lidhin përsëri botën e fragmentuar dhe shoqëritë e polarizuara, ku ka gjithnjë e më pak ndërveprim midis njerëzve, si dhe se si kapitali mund të shndërrohet në një mjet për uljen e tensioneve përmes zbatimit të këtyre teknologjive.

“Përveç këtij kuadri të përgjithshëm, kjo është një mundësi fantastike për takime. Sapo përfundova një takim me drejtorin e përgjithshëm të Ekspozitës Botërore në Arabinë Saudite. Arabia Saudite, përveçse është një nga vendet më të pasura në botë, do të organizojë Ekspozitën Botërore në vitin 2030, dhe ne biseduam për mënyrat e bashkëpunimit që të dyja ekspozitat, ajo në Serbi dhe ajo në Arabinë Saudite, të jenë sa më të suksesshme. Ky vend, përveç burimeve të mëdha materiale, tërheq një numër të madh talentesh nga e gjithë bota, njerëz nga fusha të ndryshme që me përvojën e tyre kontribuojnë në zhvillimin e Ekspozitës. Për ne është një mundësi e madhe të krijojmë një partneritet me këtë Ekspozitë. Jam i gëzuar për zhvillimin e përgjithshëm të marrëdhënieve tona me Arabinë Saudite, e cila është një nga vendet udhëheqëse të botës islame”, theksoi Gjuriq.

Ai shtoi se është shumë e rëndësishme që Serbia të jetë e pranishme në Riad.

“Serbia është pa dyshim një nga destinacionet më atraktive për investime, jo vetëm në Ballkan, por edhe në Evropën Juglindore, duke pasur parasysh faktin se jemi të vendosur në një pozicion qendror, kemi një potencial të madh talentësh dhe një kuadër rregullator shumë të gjerë që mundëson krijimin e ekosistemeve shkencore e teknologjike, të cilat ndoshta mungojnë në disa vende të tjera evropiane. Prandaj mund të krenohemi me faktin se ekonomia e Serbisë është strukturuar në mënyrë të tillë që teknologjitë e reja tashmë po e tejkalojnë bujqësinë në pjesëmarrjen e tyre në BPV, ndërkohë që jemi edhe një vend që ka qendra të avancuara të të dhënave, si ajo në Kragujevac, e cila është një qendër shtetërore e të dhënave, por që përdoret nga disa prej kompanive më të mëdha. Nuk është rastësi që kompani të mëdha si Microsoft, Oracle, madje edhe kompani automobilistike si Rivian, zhvillojnë produktet e tyre në Serbi, sepse tek ne ka si talente, ashtu edhe një kuadër rregullator që e lejon këtë gjë”, theksoi Gjuriq.

Ai shtoi se Serbia, në përputhje me këtë, do të vazhdojë të përdorë teknologjinë, dijen dhe shkencën si mjete për të kapërcyer hendekun mes saj dhe vendeve më të zhvilluara, duke theksuar se pjesëmarrja në këtë forum është një mundësi jo vetëm për të treguar potencialin e Serbisë, por edhe për të ndërtuar kontakte të reja, për të vërejtur trendet e reja dhe për ta pozicionuar vendin në mënyrën më të mirë të mundshme.

Gjuriq tha se në brezin e ri, në shkolla dhe universitete në Serbi, si edhe mes kuadrit shkencor, ka njerëz që në nivel global janë emra të mëdhenj dhe seriozë, ndaj shansi ynë zhvillimor është që shkenca dhe teknologjia të zbatohen me më shumë energji në segmente të ndryshme të jetës.

Ministri theksoi veçanërisht se gëzohet për zhvillimin e përgjithshëm të marrëdhënieve ndërmjet Serbisë dhe Arabisë Saudite, si dhe për mundësinë që në shumë takime ta prezantojë Serbinë ashtu siç është në të vërtetë, një vend që prin në zhvillimin dhe zbatimin e teknologjive moderne.