Gjuriq me Miçellin: Mbështetje parimore nga Bahamas për integritetin territorial të Serbisë

Ministri i Punëve të Jashtme të Serbisë, Marko Gjuriq, bisedoi sot, në kuadër të punimeve të Sesionit të 55-të të Asamblesë së Përgjithshme të Organizatës së Shteteve Amerikane në Antigua dhe Barbuda, me ministrin e Punëve të Jashtme dhe Shërbimeve Publike të Bahamës, Frederik Miçell. Gjuriq shprehu falënderim për mbështetjen parimore të Bahamës ndaj integritetit territorial dhe sovranitetit të Serbisë, duke e vlerësuar këtë qëndrim si tregues të respektit të ndërsjellë dhe përkushtimit të qëndrueshëm ndaj së drejtës ndërkombëtare.

Gjuriq dhe Miçell biseduan për forcimin e dialogut politik dhe avancimin e bashkëpunimit bilateral.

Ministri theksoi përkushtimin e Serbisë për zhvillimin e marrëdhënieve me shtetet e rajonit të Amerikës Latine dhe Karaibeve, veçanërisht përmes bashkëpunimit brenda organizatave rajonale siç janë Organizata e Shteteve Amerikane, Komuniteti i Karaibeve dhe Asociacioni i Shteteve të Karaibeve. Këto platforma, siç theksoi ai, përbëjnë mekanizma të rëndësishëm për avancimin e lidhjeve politike dhe ekonomike ndërmjet Serbisë dhe Bahamës.

Sa i përket bashkëpunimit ekonomik, ministri Gjuriq theksoi gatishmërinë e Serbisë për të shqyrtuar mënyra konkrete për thellimin e marrëdhënieve tregtare dhe investuese dhe vendosjen e kontakteve të drejtpërdrejta ndërmjet komuniteteve të biznesit të të dyja vendeve.

Shefi i diplomacisë serbe drejtoi një ftesë zyrtare për këtë shtet që të marrë pjesë në ekspozitën ndërkombëtare "Expo 2027" në Beograd, e cila përfaqëson një mundësi për të prezantuar potencialet kulturore, turistike dhe ekonomike të vendeve pjesëmarrëse.