Gjuriq pas mbledhjes së KS të OKB-së: Nuk mbetëm pa u përgjigjur, në të ardhmen formimi i AKS duhet të zërë vend qendror

Ministri i Punëve të Jashtme i Serbisë, Marko Gjuriq, theksoi sonte, pas mbledhjes së Këshillit të Sigurimit të OKB-së në Nju Jork, se formimi i Asociacionit të Komunave Serbe duhet të zërë vend qendror në të ardhmen.

“Në Këshillin e Sigurimit u zhvillua një betejë e ashpër për Kosovën dhe Metohinë. Nuk mbetëm pa iu përgjigjur përpjekjeve për ta shndërruar popullin serb në Kosovë e Metohi nga viktimë në fajtor, për ta fshehur terrorin ndaj serbëve, i cili pasqyrohet në më shumë se 100 incidente etnike gjatë një periudhe raportuese të UNMIK-ut, si dhe përpjekjeve të regjimit të Kurtit për ta paraqitur Kosovën e Metohinë si një parajsë demokratike, ndërsa Serbinë si Mordorin, ku nuk respektohen të drejtat e asnjë komuniteti”, theksoi Gjuriq në një deklaratë për gazetarët.

Ai theksoi se ishte e dukshme obsesioni politik i përfaqësuesve të regjimit të Kurtit me Aleksandar Vuçiqin dhe familjen e tij, si dhe përpjekja për të justifikuar ndalimin e serbëve për të votuar në territorin e Kosovës e Metohisë, çështje për të cilën tani askush nuk flet më.

“U përpoqën ta paraqisnin tragjedinë që ndodhi në Banjskë si faj ekskluzivisht të serbëve, ndërsa ta fshihnin faktin se humbën jetën tre serbë nga Kosova e Metohia, pa asnjë mundësi që të dëgjohej edhe pala serbe e kësaj ngjarjeje. Të gjitha këto sot i paraqitëm para opinionit ndërkombëtar në mbledhjen e Këshillit të Sigurimit të OKB-së”, theksoi ai.

Gjuriq theksoi se zëri i Serbisë u dëgjua në organin më të lartë ndërkombëtar.

Ai bëri të ditur se kishte folur për sulmin ndaj djemve serbë në prag të Krishtlindjes ortodokse të vitit 2023, rast që nuk ka marrë asnjë epilog.

“Një temë e rëndësishme që trajtova dhe me të cilën e nisa fjalimin tim ishin aktgjykimet e Dhomave të Specializuara kundër udhëheqësve të UÇK-së. Thashë se nuk kërkojmë as drejtësi serbe, as drejtësi shqiptare, por drejtësi objektive për viktimat, serbe dhe shqiptare, të cilat UÇK i vrau në Kosovë e Metohi. Përfaqësuesi i regjimit të Kurtit u përpoq t'i paraqiste viktimat serbe si trillim. Ndërsa unë flisja për viktimat serbe dhe shqiptare, ai, duke i fyer viktimat serbe, thoshte se ato ishin trillim”, shpjegoi Gjuriq.

Sipas tij, këto janë gjëra për të cilat duhet të jemi të vetëdijshëm, por edhe për bashkësinë ndërkombëtare ishte e qartë se pala serbe ka një qasje të ndershme dhe objektive ndaj së vërtetës.

“Në të ardhmen, formimi i AKS-së duhet të zërë vend qendror. Fëmija që ka lindur kur u nënshkrua marrëveshja për AKS, sot është adoleshent. Serbët jetojnë në aparteid, nën një protektorat të vazhdueshëm policor në veri, ku u shkelen çdo ditë të drejtat elementare. Këtë e thashë me zë të lartë dhe qartë para amerikanëve, rusëve dhe kinezëve. Zëri serb për këtë çështje do të dëgjohet përgjithmonë, ashtu siç do të mbetet gjithmonë e gjallë dëshira jonë dhe e vendit tonë për drejtësi kur bëhet fjalë për KeM”, theksoi Gjuriq.

Ai tha se ishte e dukshme dëshira e regjimit të Kurtit për të ndërhyrë dhe për t'u përfshirë në zgjedhjet në Serbi.

“Disa do të thoshin se, si qytetarë të Serbisë, kanë të drejtë ta shprehin qëndrimin e tyre. Ata dëshirojnë dështimin e njërës palë dhe suksesin e tjetrës, dhe këtë nuk e fshehën as sot në Këshillin e Sigurimit të OKB-së. Regjimi i Kurtit e përmendi edhe këtu emrin e Aleksandar Vuçiqit dhe të familjes së tij në kontekst negativ dhe kjo duhet të dihet”, nënvizoi shefi i diplomacisë serbe.