Gjuriq: Serbia dhe SHBA të përkushtuara fuqishëm për forcimin e marrëdhënieve në nivel strategjik

Ministri i Punëve të Jashtme të Serbisë, Marko Gjuriq, u takua sot, në kuadër të Sesionit të 55-të të Asamblesë së Përgjithshme të Organizatës së Shteteve Amerikane në Antigua dhe Barbuda, me zëvendëssekretarin e shtetit të Shteteve të Bashkuara të Amerikës, Kristofer Landau.

Gjuriq, pas takimit, theksoi se Serbia dhe SHBA janë fuqishëm të përkushtuara për forcimin e marrëdhënieve në nivel strategjik. Ai vuri në dukje se ky është takimi i dytë me një zyrtar të lartë amerikan brenda muajit të fundit, gjë që paraqet një mundësi të rëndësishme për përmirësimin e marrëdhënieve ndërmjet dy vendeve.

„Për ne është jashtëzakonisht e rëndësishme që të kemi mundësinë të bisedojmë me një nga njerëzit që gjendet në rrethin e ngushtë të presidentit Trump për përmirësimin e marrëdhënieve ndërmjet Serbisë dhe SHBA-ve në nivel strategjik. Ajo që më gëzon ta ndaj pas këtij takimi është bindja ime e fortë se të dy palët janë vendosur dhe të përkushtuara që të punojnë aktivisht në afrimin e ndërsjellë, si në sferën politike, ashtu edhe në atë ekonomike, të sigurisë dhe shumë fusha të tjera“, theksoi Gjuriq.

Gjatë bisedës, siç tha ai, është diskutuar edhe për mundësinë e nisjes së një dialogu strategjik ndërmjet Serbisë dhe SHBA-ve, si dhe për tema të ndryshme rajonale.

Ministri Gjuriq ka theksuar në veçanti pozitën e popullit serb në Kosovë dhe Metohi, si dhe sfidat e tjera me të cilat përballet Serbia.

Ai shprehu kënaqësinë që gjatë bisedimeve janë identifikuar shumë mundësi për përmirësimin e bashkëpunimit dhe përputhjen e interesave të të dyja shteteve.

Shefi i diplomacisë serbe theksoi gjithashtu rëndësinë e marrëdhënies personale ndërmjet presidentit të Serbisë, Aleksandar Vuçiq, dhe presidentit Donald Trump, e cila, sipas tij, u konfirmua menjëherë pas zgjedhjeve të presidentit amerikan. Në këtë kontekst, ministri përcolli dëshirën e Serbisë për të mirëpritur presidentin e SHBA-së në Beograd.

„Dëshirojmë të tregojmë mikpritjen tonë tradicionale. Nuk ka dyshim se ai pritje do të ishte më i ngrohtë dhe më solemn sesa në shumë kryeqytete të tjera që krenohen me marrëdhëniet e tyre tradicionale me SHBA-të“, tha Gjuriq.

Ministri Gjuriq iu referua gjithashtu vendimit të administratës amerikane për të shtyrë zbatimin e sanksioneve ndaj industrisë serbe të naftës, duke theksuar se kjo masë është një konfirmim shtesë i cilësisë dhe komunikimit të vazhdueshëm midis Serbisë dhe SHBA-së.

Ai deklaroi se me atë rast e falënderoi Zëvendës Sekretarin e Shtetit për vendimin, duke theksuar se, megjithëse ende ekziston nevoja për një zgjidhje më të gjerë për marrëdhëniet midis fuqive të mëdha si Shtetet e Bashkuara dhe Federata Ruse, është me rëndësi kyçe që qytetarët e Serbisë të mos vuajnë pasoja negative.