Grenell: Problemet nuk zgjidhen në Bruksel, por këtu, komuniteti ndërkombëtar duhet të dëgjojë serbët

Ish-i Dërguari i Posaçëm i Shteteve të Bashkuara të Amerikës për dialogun ndërmjet Beogradit dhe Prishtinës, Riçard Grenell, ka vlerësuar sot, pas bisedës me përfaqësuesit e serbëve nga Kosova, se për të de-përshkallëzuar situatën në veri, komuniteti ndërkombëtar duhet të dëgjojë serbët dhe se lidershipi amerikan është i nevojshëm në zgjidhjen e situatës.

Në fjalën e tij para gazetarëve, Grenell falënderoi 20 përfaqësuesit e serbëve që gjetën kohë për t'i përcjellë atij problemet dhe me çfarë po përballeshin.

"Jam i frustruar që këtu nuk ka bashkësi ndërkombëtare. Pse nuk erdhi komuniteti ndërkombëtar për t'i dëgjuar këta njerëz? Pse nuk janë këtu për të parë se cilat janë problemet reale? Ju duhet t'i dëgjoni këta njerëz. Kam dëgjuar shumë shqetësim”, tha ai.

Ai shprehu besimin se bashkësia ndërkombëtare do të vijë dhe do të dëgjojë serbët, sepse kjo është e nevojshme për të arritur përparim.

"Për dikë që nuk është më në qeverinë amerikane, i cili e ndjek situatën nga anash, është zhgënjyese të shohësh se si situata është përkeqësuar ndjeshëm në tre vitet e fundit. Ne ishim në rrugën e duhur, duke u fokusuar në normalizimin ekonomik. Besoj se populli i Kosovës, serbët dhe shqiptarët duan paqe, punë të mira, që fëmijët e tyre të qëndrojnë dhe të punojnë dhe të kenë një jetë të mirë. Ata nuk kërkojnë shumë”, theksoi ai.

Grenell vuri në dukje se politika e manovrimit duhet të ndalet dhe të përqendrohet në progresin ekonomik, në të cilin ai e sheh zgjidhjen.

"Unë po i kërkoj BE-së të përqendrohet në çështjet ekonomike. Gjithashtu i bëj thirrje qeverisë amerikane të vijë këtu dhe të dëgjojë njerëzit. Asgjë nuk mund të zëvendësojë lidershipin amerikan, për të cilin ne kemi nevojë tani. Unë shoh një rrugë të qartë për përparim, për de-përshkallëzimi, dhe duhen disa hapa të guximshëm”, shpjegoi ai.

Ai ka thënë se bashkëbiseduesit e tij në Mitrovicën e Veriut i kanë vënë në dukje të gjitha veprimet e njëanshme të Albin Kurtit.

"Vetëm pak ditë më parë, komuniteti ndërkombëtar u përqendrua në thirrjen për t'i dhënë fund veprimeve të njëanshme. Qeveria amerikane hodhi një "vijë të kuqe" një javë më parë dhe tha se çfarë duhet të bëjë. Ne kemi nevojë për një udhëheqje të tillë", nënvizoi ai.

Në takimin me Grenellin morën pjesë kryesia e Listës Serbe, duke përfshirë presidentin Goran Rakiq dhe nënkryetarin Igor Simiq, ish-kryetarin e Komunës së Zveçanit Dragisha Milloviq, si dhe drejtorë të institucioneve shëndetësore dhe arsimore nga Kosova.