Grenell: Tre vjet më parë u fol për tërheqjen e NATO-s nga Kosova

Ish-i dërguari i posaçëm i Shteteve të Bashkuara të Amerikës për dialogun ndërmjet Kosovës dhe Serbisë, Riçard Grenell, ka thënë se në vitin 2020 është diskutuar për tërheqjen e forcave të NATO-s nga Kosova sepse në atë kohë është bërë përparim i madh në dialog.

“Donald Trump dhe ekipi i tij bënë lëvizje të mëdha dhe inovative për të afruar Kosovën dhe Serbinë.  Ne kishim një marrëveshje ekonomike që të dyja palët po e shtynin përpara. Duhet të jem i sinqertë, pasi kemi bërë shumë progres në vitin 2020, kemi diskutuar idenë e mundshme të largimit të forcave të NATO-s nga Kosova.  Ishte koha, nuk kishin çfarë të bënin. Të dy palët ranë dakord për zhvillimin ekonomik, hapën kufijtë, ranë dakord për linjën ajrore Prishtinë-Beograd, Lufthansa tha se do ta sigurojë atë fluturim, ne bëmë shumë përparim, por më pas erdhi ekipi i Bajdenit dhe vendosi të ndryshonte politikën e SHBA-së për Ballkanin”, tha Grenell.

Siç deklaroi ai, tani politika e SHBA-së është se në krye janë evropianët.

"Pra, për tre vitet e fundit evropianët kanë qenë në krye dhe ajo që ne shohim është kaos, dhunë, konflikte dhe shohim një rritje të pranisë së trupave në Kosovë. Këto janë faktet", tha Grenell.