Hoti: Problemi nuk është në formatin e dialogut, por në mungesën e vullnetit për të zbatuar atë që është arritur

Afrim Hoti, profesor i drejtësisë dhe marrëdhënieve ndërkombëtare në Universitetin e Prishtinës, thotë për Kosovo online se dialogu ndërmjet Beogradit dhe Prishtinës solli marrëveshje kyçe të ndërmjetësuara nga Bashkimi Evropian dhe se ajo nuk duhet të ndryshohet. Pengesa kryesore, vlerëson ai, është mungesa e vullnetit politik nga të dyja palët për zbatimin e pikave të dakorduara.

“Kur kemi parasysh që ka një marrëveshje në fuqi, e ndërmjetësuar nga Bashkimi Evropian, si dhe një plan veprimi që parashikon mënyrën se si duhet të zbatohet një marrëveshje e caktuar, mund të themi se marrëveshja është në fuqi dhe gjithçka që na duhet është të merremi me aspektin tjetër për të cilin dua të flas, që është mënyra se si ta zbatojmë atë. Megjithatë, aktualisht kemi mungesë të vullnetit për zbatim nga të dyja palët”, thotë profesori nga Prishtina.

Ai vlerëson se ka pasur vonesa në zbatimin e marrëveshjes për shkak se të dyja palët ishin në pritje të rezultateve të zgjedhjeve në Shtetet e Bashkuara të Amerikës.

Tani që në krye të SHBA-së është një administratë e re, vlerëson Hoti, ka një shans real për rifillimin e dialogut.

“Gjithçka që na duhet është një lloj presioni, në radhë të parë nga BE-ja, por duhet edhe një dinamizimi i procesit që duhet të vijë nga administrata e re në SHBA, e cila do të krijojë dhe ushtrojë presion tek të dyja palët për zbatimin e marrëveshjes. Nëse një presion i tillë ekziston, atëherë nga këndvështrimi im nuk duhet asnjë formë e re, sepse nuk ka nevojë për një format të ri kur kemi një marrëveshje në fuqi”, ka përfunduar Hoti.