Hristodulidis në Beograd: Qëndrimi i Qipros në lidhje me Kosovën është i qartë dhe i pandryshuar

Presidenti i Qipros, Nikos Hristodoulidis, ka deklaruar se qëndrimi i Qipros mbetet i pandryshuar sa i përket Kosovës dhe se vendi i tij e mbështet Serbinë për ruajtjen e integritetit territorial dhe sovranitetit të saj.

"Kur është fjala për dialogun ndërmjet Beogradit dhe Prishtinës, ne mbështesim qeverinë e Serbisë. Qëndrimi ynë për çështjen e Kosovës është i qartë dhe qëndrimi ynë nuk mund të ndryshohet pa respektuar sovranitetin dhe integritetin territorial të Serbisë", ka bërë të ditur Hristodulidis në konferencën për media pas takimit me presidentin e Serbisë Aleksandar Vuçiq në Beograd.

Hristodulidis falënderoi Serbinë për mbështetjen e saj në negociatat kur bëhet fjalë për zgjidhjen e "çështjes së Qipros".

Presidenti i Qipros u shpreh i kënaqur që po viziton Beogradin, duke vlerësuar se marrëdhëniet mes dy vendeve janë në nivel të lartë.

“Marrëdhëniet tona bazohen në marrëdhënie tradicionale dhe ka ende vend për thellimin e tyre, veçanërisht në sektorin e mbrojtjes, arsimit dhe turizmit. Serbia ka bërë shumë përparime, veçanërisht pasi ju (Vuçiq) keni qenë në pushtet, gjatë viteve të fundit zhvillimi ekonomik është rritur shumë”, vlerësoi Hristodulidis.

Ai kujtoi se janë vendosur fluturime direkte ndërmjet Serbisë dhe Qipros, gjë që kontribuon shumë në zhvillimin e turizmit, duke theksuar se vendi i tij është i hapur për të pritur më shumë vizitorë nga Serbia.

Ai tha se në kuadër të vizitës së tij në Beograd do të nënshkruhen tre memorandume shkëmbimi në fushën e arsimit, inovacionit dhe shkencës ndërmjet dy ministrive të punëve të brendshme.

Siç thotë, Serbia ka arritur hapa të rëndësishëm në lidhje me reformat, të cilat duhet të njihen nga BE.

"Qiproja është një nga ofruesit më të mëdhenj të mbështetjes për Serbinë për integrimin në BE," ka bërë të ditur Hristodulidis.

Ai i ftoi nikoqirët e tij sot për të vizituar Qipron dhe u shpreh se të dy vendet do të kontribuojnë në zhvillimin e mëtejshëm të marrëdhënieve dhe përparimin kur është fjala për zgjidhjen e "çështjes së Qipros" dhe integrimin evropian të Serbisë.