Kamberi: Kosova është de fakto tashmë në NATO, anëtarësimi dejure varet nga konteksti i sigurisë

Vendimi për anëtarësimin e Kosovës në NATO varet para së gjithash nga konteksti i sigurisë dhe vlerësimi i vendeve perëndimore, thotë për Kosovo online Belgzim Kamberi nga Instituti për Politika Sociale “Musine Kokalari”.

Pasi Kosova nuk e mori anëtarësimin e dëshiruar në Këshillin e Evropës, disa analistë vlerësojnë se Prishtina do t'i ridrejtojë përpjekjet drejt anëtarësimit në NATO, por Kamberi thekson se gjithçka varet nga qasja e vendeve Perëndimore.

“Sa i përket NATO-s, do të kishte një lloj prioriteti, nëse ato vende e shohin se në kontekstin e sigurisë realisht kanë nevoja dhe prioritete të mëdha që Kosova të jetë anëtare e NATO-s, sepse korniza e sigurisë së zonës ballkanike dhe Kosova disi është në rrezik”, thotë bashkëbiseduesi ynë.

Ai shton se në këtë kuptim mund të jetë më e lehtë për Kosovën të anëtarësohet në NATO, por, siç thotë ai, gjithçka varet edhe nga ajo nëse shtetet kryesore të BE-së dhe SHBA-së do të kishin të njëjtën qasje që kishin për Këshillin e Evropës ku fillimisht kërkuan që Kosova të bëjë diçka për themelimin e AKS.

“A do të kishin të njëjtën praktik për NATO-n, ku së pari do të kërkonin që Kosova të dëshmojë se është e gatshme të zbatojë atë që është rënë dakord me Serbinë në procesin e normalizimit të marrëdhënieve ndërmjet Kosovës dhe Serbisë, apo do të ishte një proces i ndarë nga dialogu dhe normalizim”, pyet Kamberi.

Sa i përket anëtarëve të BE-së që nuk e njohin Kosovën, Kamberi vlerëson se qëndrimi i tyre ndaj hyrjes së Kosovës në Aleancë do të varet edhe nga politika e sigurisë dhe prioritetet e NATO-s në Ballkan.

"Ne kemi parë që për sa i përket njohjes së shtetit palestinez nga Spanja, apo ndonjë vend tjetër tani, ata kanë një lloj zhvillimi politik prioritar. Mbetet për t'u parë nëse ka ndonjë urgjencë për SHBA-të dhe vendet kryesore të NATO-s në lidhje me përfshirjen e Kosovës në NATO”, konsideron.

Ai po ashtu vlerëson se Kosova është de fakto tashmë në NATO dhe se misioni i KFOR-it është aty.

"Në një kontekst, Kosova është një anëtare defakto e NATO-s. Nëse do të jetë de jure do të varet nga konteksti i sigurisë dhe lufta në Ukrainë sigurisht që do të ketë ndikim në kontinentin evropian dhe në Ballkan", thekson Kamberi dhe shton se do të ishte “vetëm një hap tjetër përpara, duke pasur parasysh se Kosova ka qenë nën ndikimin e NATO-s që nga viti 1999”.