KFOR: U anulua takimi i gjeneralmajorit Ulutash me Albin Kurtin

KFOR njoftoi se takimi ndërmjet komandantit të KFOR-it, gjeneralmajorit Ozkan Ulutash, dhe Albin Kurtit nuk u zhvillua sot për shkak të rrethanave të paparashikuara, duke theksuar se komandanti mbetet në kontakt të ngushtë me bashkëbiseduesit kryesorë, përfshirë përfaqësuesit e institucioneve në Kosovë.

KFOR-i theksoi se vazhdon aktivitetet e përditshme në mbarë Kosovën, me qëllim ruajtjen e një mjedisi të sigurt për të gjitha komunitetet, në përputhje me Rezolutën 1244 të Këshillit të Sigurimit të OKB-së të vitit 1999.

Kryeministri në detyrë i Kosovës, Albin Kurti, deklaroi më herët gjatë ditës se pasdite do të takohej me komandantin e KFOR-it, gjeneralmajorin Ozkan Ulutash, për të diskutuar edhe çështjen e hapjes së urës mbi Ibër.

„Sot pasdite kam edhe një takim në Qeveri me gjeneralin e KFOR-it, përkatësisht me komandantin Ozkan Ulutash. Pra, jemi në komunikim të përditshëm, si Zyra e Kryeministrit, ashtu edhe Ministria e Punëve të Brendshme, në mënyrë që gjithçka të zhvillohet qetë dhe në mënyrë të sigurt“, tha ai.

Ndaj këtij paralajmërimi reagoi presidenti i Serbisë, Aleksandar Vuçiq, i cili tha se në këtë mënyrë Serbisë po i dërgohet sinjal se nuk ka kuptim të negociojë, duke qenë se Marrëveshja e Brukselit ende nuk është zbatuar.

Presidenti i Serbisë më herët i dërgoi një letër sekretarit të përgjithshëm të NATO-s, Mark Rute, në të cilën shprehu shqetësim të thellë për vendimin e KFOR-it që të tërhiqet nga ura mbi Ibër dhe ta përfshijë Policinë e Kosovës në „arkitekturën e sigurisë“ në zonën e Manastirit të Deçanit. Ai theksoi se ky veprim ishte ndërmarrë para kohe dhe se vlerësimet e sigurisë të KFOR-it nuk i kishin identifikuar në mënyrë adekuate të gjitha rreziqet për sigurinë e popullsisë serbe dhe popullsisë tjetër joshqiptare në veri të Kosovës.

KFOR-i do të ruajë një prani të fuqishme dhe të dukshme në veri të Kosovës „në dobi të të gjitha komuniteteve, përfshirë edhe komunitetin serb“, deklaroi të premten një zyrtar i paidentifikuar i NATO-s. Sa i përket letrës së presidentit Vuçiq drejtuar Mark Rutes, nga Aleanca u përgjigjën se „sekretari i përgjithshëm i NATO-s është në kontakt të rregullt me presidentin Vuçiq“.