Lista Serbe në takim me Lopesin: Roli i EULEX-it nuk guxon të reduktohet në monitorim formal të situatës

Delegacioni i Listës Serbe, i udhëhequr nga kryetari Zlatan Elek, u takua me shefin e ri të EULEX-it, Antero Lopes, me të cilin diskutoi për problemet me të cilat përballet populli serb në Kosovë dhe cenimin e të drejtave themelore njerëzore, qytetare dhe politike të serbëve.

Përfaqësuesit e Listës Serbe theksuan veçanërisht, siç thuhet në njoftimin e tyre, dhunën e vazhdueshme institucionale ndaj popullit serb, si dhe presionet dhe veprimet e kundërligjshme ndaj përfaqësuesve serbë dhe organeve komunale.

Siç u njoftua, veprime të tilla cenojnë më tej sigurinë juridike, funksionimin e vetëqeverisjeve lokale dhe besimin e qytetarëve tek institucionet.

„Gjatë takimit u theksua se shkelja e të drejtave të serbëve, mosrespektimi i ligjit dhe keqpërdorimi i mekanizmave institucionalë janë bërë dukuri të zakonshme, ndërsa mungesa e reagimit adekuat të institucioneve kompetente i inkurajon më tej veprimet e tilla dhe e thellon ndjenjën e pasigurisë te populli ynë“, thuhet në njoftim.

Delegacioni i Listës Serbe kërkoi nga EULEX-i që, në përputhje me mandatin e tij, të sigurojë mbikëqyrje të vazhdueshme, objektive dhe profesionale të veprimeve të Policisë së Kosovës dhe institucioneve korrektuese, duke i kushtuar vëmendje të veçantë trajtimit të pjesëtarëve të popullit serb, respektimit të procedurave ligjore, të drejtave të personave të privuar nga liria dhe parandalimit të çdo forme diskriminimi, zbatimi selektiv të ligjit dhe arbitrariteti institucional.

„U theksua veçanërisht se roli i EULEX-it nuk guxon të reduktohet në monitorim formal të situatës, por se është e domosdoshme të vihen në dukje në kohë dhe në mënyrë të paanshme të gjitha parregullsitë e konstatuara, me rekomandime të qarta dhe hapa konkretë brenda mandatit të misionit, në mënyrë që të parandalohen shkeljet e mëtejshme të të drejtave dhe të sigurohet llogaridhënia për veprimet e kundërligjshme“, deklaruan nga Lista Serbe.

Ata theksojnë se respektimi i sundimit të ligjit, mbrojtja e të drejtave themelore të njeriut dhe zbatimi i barabartë i ligjit ndaj të gjithë qytetarëve janë minimumi që duhet të garantohet.

„Populli serb nuk guxon t'i nënshtrohet diskriminimit dhe presioneve institucionale pa reagimin adekuat të misioneve ndërkombëtare, detyra e të cilave është mbikëqyrja e sundimit të ligjit“, thuhet në përfundim të njoftimit të Listës Serbe.

Në njoftimin e EULEX-it thuhet se Lopesi diskutoi me drejtuesit e Listës Serbe për çështje që lidhen me sundimin e ligjit dhe se rikonfirmoi përkushtimin e vazhdueshëm të këtij misioni për të mbështetur sigurinë dhe të drejtat e njeriut të të gjitha komuniteteve në Kosovë.