Lluniq: Qëllimi kyç i stërvitjes “Defender 25” – vendosja e shpejtë e forcave amerikane në Evropë

Konsulenti në fushën e gjeopolitikës dhe sigurisë, Nikolla Lluniq, deklaroi se qëllimi kryesor i stërvitjes ushtarake “Defender 25” është vendosja e shpejtë e forcave amerikane në Evropë, ndërsa Ballkani Perëndimor është përzgjedhur për të ushtruar përforcimin e krahut lindor të NATO-s, i cili po fuqizohet me shpejtësi.

“Qëllimi bazë i kësaj stërvitjeje është ushtrimi për vendosjen e shpejtë të forcave amerikane në Evropë. Sa i përket aleatëve dhe partnerëve evropianë, qëllimi i tyre është rritja e ndërveprueshmërisë me forcat amerikane dhe brenda aleancës së NATO-s,” thekson Lluniq për Kosovo online.

“Defender Europe 25” është stërvitja më e madhe ushtarake e SHBA-së në kontinentin evropian.

Ajo zhvillohet në tri faza, dhe Lluniq thotë se në stërvitje, që shtrihet nga Skandinavia, përmes Ballkanit Perëndimor e deri në Evropën Qendrore, do të përfshihen 25 partnerë të SHBA-së nga vende aleate.

Në këtë mënyrë, thekson ai, të gjitha vendet pjesëmarrëse dërgojnë një mesazh për integrimin në NATO.

“Po dërgohet një mesazh mbështetjeje për integrimin në aleancën e NATO-s dhe nuk ka dyshim se të gjithë partnerët me të cilët po zhvillohet stërvitja, herët a vonë, do të jenë në rrugën e integrimit të plotë në sistemin kolektiv të sigurisë,” thekson ky analist.

Ai sqaron se Ballkani Perëndimor është zgjedhur qëllimisht si një terren stërvitjeje për pjesën e dytë të stërvitjes, por thekson se arsyeja nuk janë vendet e rajonit dhe situata aktuale e sigurisë, por stërvitja e "krahut lindor" të NATO-s, në përgjigje të krizës ukrainase.

“Krahu lindor i NATO-s po forcohet me shpejtësi dhe të gjitha kapacitetet në të gjithë krahun lindor të NATO-s po përmirësohen. Është për të ardhur keq që ne në Ballkanin Perëndimor nuk po marrim pjesë në atë stërvitje”, tha Lluniq.

Ai shton se kjo i referohet kryesisht Serbisë, e cila nuk heq dorë nga neutraliteti ushtarak, por as nuk merr pjesë në ushtrime ushtarake ndërkombëtare.

"Neutraliteti ushtarak është i paqëndrueshëm në një zhvillim kaq të shpejtë teknologjik dhe kur koncepti i luftës ka ndryshuar në përgjithësi.Ne i përmbahemi konceptit të neutralitetit dhe në vitin 2022 kemi futur një moratorium për të gjitha ushtrimet ushtarake që janë të pakuptimta, që na izolojnë dhe zvogëlojnë aftësitë tona ushtarake", është i bindur Lluniq.