Luçiq për Kosovo online: Do të luftoj me të gjitha mjetet juridike kundër vendimit të Prishtinës

Drejtori i përgjithshëm i “Telekom Srbija”, Vladimir Luçiq, deklaroi për Kosovo online se ende nuk është njoftuar zyrtarisht për vendimin e Ministrisë së Punëve të Brendshme të Kosovës për ta shpallur person të padëshiruar, por se, nëse ky informacion është i saktë, kundër një vendimi të tillë do të luftojë me të gjitha mjetet juridike.

“Ende nuk kam marrë informacion zyrtar, por nëse kjo është e vërtetë, më vjen shumë keq për këtë vendim të administratës së Prishtinës, veçanërisht duke pasur parasysh se personalisht kam insistuar për investime sa më të mëdha në atë territor dhe për hapjen e vendeve të reja të punës”, tha ai.

Luçiq thotë se në deklarimin e tij të djeshëm nuk ka thënë asgjë që nuk e kishte deklaruar më parë lidhur me veprimet e administratës aktuale në Prishtinë.

“Gjatë gjithë këtyre viteve, në paraqitjet e mia publike kam pasur të njëjtin qëndrim lidhur me sjelljen e administratës aktuale, ndaj as në paraqitjet e fundit nuk kam thënë asgjë të re, përveç fakteve të pakontestueshme. Personalisht do të luftoj me të gjitha mjetet juridike kundër një vendimi të tillë, për të cilin shpresoj se, nëse është i saktë, do të tërhiqet shpejt”, deklaroi Luçiq.

Ministria e Punëve të Brendshme e Kosovës e ka shpallur drejtorin e përgjithshëm të “Telekom Srbija” person të padëshiruar, një ditë pas vizitës së tij në pikën e kompanisë MTS d.o.o. në Mitrovicën e Veriut.

Vendimin e ka nënshkruar ministri në detyrë, Xhelal Sveçla, ndërsa me këtë vendim Luçiqit i ndalohet hyrja në territorin e Kosovës.

Në arsyetimin e vendimit thuhet se, përmes deklaratave publike, ai ka shprehur qëndrime të cilat, sipas vlerësimit të MPB-së së Kosovës, synojnë “rrezikimin e drejtpërdrejtë të sovranitetit, integritetit territorial dhe rendit kushtetues të Kosovës”.

Gjatë vizitës së djeshme në Mitrovicën e Veriut, Luçiq paralajmëroi modernizimin e telefonisë fikse në zonat ku jetojnë serbë dhe ndërtimin e objekteve të reja të kompanisë në disa komuna, duke theksuar se “Telekom Srbija” nuk planifikon të largohet nga Kosova.

“Besoj se ajo që po bën tani Telekom Srbija, pra fakti që po vazhdojmë të ndërtojmë objekte të reja, nuk është vetëm e mirë për cilësinë, por është edhe një simbol se ne, si kompani, nuk mendojmë të largohemi nga ky territor, por jemi të bindur se në një moment do të marrim lejet për të operuar në të gjithë territorin e Kosovës dhe Metohisë, se do të jemi operatori më i madh dhe se do ta kenë të vështirë të na pengojnë në këtë drejtim”, përfundoi me këtë rast Luçiq.