Macut: Angazhimi ndaj integrimit evropian është prioritet; Kos: Do ta mbështes Serbinë në rrugën drejt BE-së

Kryeministri i Serbisë, Gjuro Macut, deklaroi sot, pas një takimi me Komisioneren Evropiane për Zgjerim, Marta Kos, se angazhimi ndaj integrimit evropian është përparësi absolute e Serbisë. Komisionerja Kos tha se do të mbështesë Serbinë dhe aspiratat e qytetarëve të saj në rrugën drejt Bashkimit Evropian.

“Angazhimi ndaj integrimit evropian është një përparësi absolute dhe qeveria e kryesuar nga unë do të vazhdojë fuqishëm me këtë proces”, tha Macut në një konferencë të përbashkët për shtyp me Kos në Qeverinë e Serbisë.

Duke kujtuar se procesi është tashmë afatgjatë dhe Serbia është ndër vendet me qëndrimin më të gjatë në anëtarësimin në BE, Macut theksoi se elementët kryesorë për përshpejtimin e hapjes së Grupit 3 janë pikërisht baza e punës së qeverisë së tij, të cilat ai i renditi në ekspozenë e tij.

"Është përmirësimi i procesit arsimor, si dhe përparimi në fushën e shkencës, kulturës dhe informacionit. Shpresoj që arsimi të jetë një nga elementët kryesorë të vizitës së Marta Kos, që ajo të mbështesë përpjekjet tona për të ruajtur dialogun dhe që mbështetja e saj e fortë do të na mundësojë ta arrijmë këtë sa më shpejt të jetë e mundur dhe ta kthejmë Serbinë në rrugën e duhur, ku ndaluam disa muaj më parë. Angazhimi ynë për këtë do të jetë absolut”, tha kryeministri Macut.

Ai theksoi se, megjithëse negociatat për anëtarësim nuk përparuan me shpejtësinë e dëshiruar, Serbia po zbaton reforma në fushën e sundimit të ligjit, gjyqësorit të pavarur dhe luftës kundër korrupsionit, të cilat do të forcohen më tej nga ndryshimet dhe miratimi i ligjeve të reja.

Macut theksoi rëndësinë e Planit të Rritjes së BE-së për Ballkanin Perëndimor, i cili është një nga mekanizmat për përshpejtimin e reformave institucionale dhe përfshirjen e Serbisë në Tregun e Përbashkët të BE-së, me qëllim arritjen e këtij qëllimi deri në fund të vitit 2026.

"Përkushtimi dhe angazhimi ynë ndaj rrugës drejt Evropës është i plotë", tha kryeministri Macut.

Kos: Do ta mbështes Serbinë në rrugën drejt BE-së

Komisionerja evropiane për zgjerim, Marta Kos, ka theksuar se do ta mbështesë Serbinë dhe aspiratat e qytetarëve të saj në rrugën drejt Bashkimit Evropian.

"Folëm shumë për vendin e Evropës në një botë që po ndryshon. Jemi përballë sfidave të reja të sigurisë dhe ndryshimeve në fushën e tregtisë. Në këtë kontekst, uniteti evropian është zgjidhja më e mirë. Në këtë proces, fqinjët tanë dhe vendet kandidate janë të rëndësishme, jo vetëm si partnerë, por edhe si anëtare të ardhshme të BE-së", theksoi Kos.

Ajo shtoi se tani ekziston një mundësi reale për bashkimin e Evropës dhe theksoi se nuk bëhet fjalë vetëm për zgjerim.

Ajo theksoi se shumë vende e kanë kuptuar se është e mundur të përshpejtohen reformat dhe shtoi se do të dëshironte që këtë ta bëjë edhe Serbia.

"Serbia ka shumë për t’i ofruar Evropës. Evropa gëzohet për këtë. Ne i kemi paraqitur kryeministrit Macuta ofertën tonë për popullin serb. Kjo ofertë është: punoni me ne në realizimin e reformave që do ta bëjnë të mundur anëtarësimin tuaj, punoni me ne në krijimin e një sistemi gjyqësor të pavarur që mund të luftojë në mënyrë efektive korrupsionin, punoni me ne për një ligj që do të çojë drejt vendosjes së mediave të lira", tha Kos.

Ajo shtoi se është e domosdoshme gjithashtu vendosja e një kornize zgjedhore që do të sigurojë që zëri i popullit serb të dëgjohet dhe që në bazë të tij të merren vendime.

"Pa këto ndryshime, Serbia nuk mund të përparojë dhe e dimë se ajo që po kërkojmë është shumë e afërt me atë që kërkojnë qytetarët që protestojnë në rrugë", theksoi Kos.

Ajo shprehu bindjen se takimi me kryeministrin ishte pozitiv dhe se ndajnë të njëjtin qëndrim për sa i përket zgjidhjes së problemeve në shoqëri, ku të gjitha pjesët duhet të jenë të përfshira.

"Transformimi i vërtetë duhet të vijë nga brenda, nuk mund të vijë nga jashtë", theksoi Kos.

Ajo njoftoi se nesër do të takohet me shumë bashkëbisedues, nga studentët në bllokadë dhe ata që duan të kthehen të mësojnë, deri te partitë politike të pushtetit dhe opozitës, por edhe me Ruzhica Gjingjiq,vejushën e ish-kryeministrit Zoran Gjingjiq, i cili, siç tha Kos, e pa Serbinë si pjesë përbërëse të vendeve demokratike dhe të zhvilluara modernisht.

"Promovimi i idesë evropiane ndonjëherë mund të jetë i rrezikshëm nëse nuk ekziston energjia dhe vrulli i nevojshëm. Pres që qeveria të punojë bashkë me ne për të realizuar idetë për të cilat fliste Gjingjiq. Qytetarët i kërkojnë dhe i meritojnë ato. Ekziston mundësia e integrimit me BE-në dhe shpresoj që Serbia do ta pranojë ofertën tonë", tha Kos.

Sot dhe nesër, Komisionerja Kos ndodhet në një vizitë zyrtare në Serbi, gjatë së cilës do të zhvillojë një sërë takimesh të rëndësishme me zyrtarët më të lartë shtetërorë dhe përfaqësues të institucioneve kryesore.

Para takimit me Kryeministren e Serbisë, Kos shkroi në rrjetin social "X" se Serbia ka kaluar muaj të vështirë, dhe se ajo është në Beograd për të dëgjuar dhe për të përsëritur mbështetjen e saj për të gjithë ata që janë të përkushtuar për të kapërcyer bllokimin aktual politik.

"Qytetarët e Serbisë meritojnë një të ardhme evropiane", deklaroi Kos.