Ministria e Kulturës së Serbisë: Sulmi ndaj kishëzës është mesazh urrejtjeje ndaj serbëve dhe trashëgimisë shpirtërore e kulturore

Ministria e Kulturës së Serbisë ka dënuar sulmin ndaj kishëzës në varrezat ortodokse në Prishtinë dhe ka bërë thirrje që faktorët ndërkombëtarë të mos jenë spektatorë të heshtur të shkatërrimit sistematik të trashëgimisë serbe dhe frikësimit të popullit.

Profanimi i kishëzës, e cila shërben për lutje dhe shërbesa mortore, ku janë thyer xhamat e dyerve dhe dritareve, përfaqëson një mesazh të qartë urrejtjeje dhe armiqësie ndaj popullit serb dhe trashëgimisë së tij shpirtërore e kulturore, thuhet në njoftimin e Ministrisë së Kulturës së Serbisë.

„Duke pasur parasysh se mbrëmë në fshatin Stanişor, në komunën e Novobërdës, janë shkruar grafitet e UÇK-së, ky sulm merr një dimension edhe më të rëndë, pasi tregon se bëhet fjalë për një model të vazhdueshëm frikësimi dhe kërcënimi. Veprime të tilla nuk janë incidente të izoluara, por pjesë e një përpjekjeje sistematike për t’i frikësuar, dekurajuar dhe dëbuar serbët nga vatrat e tyre shekullore në Kosovë e Metohi“, thuhet në deklaratë.

Përgjegjësia për krijimin e kësaj klime frike dhe intolerance, siç thekson ministria, bie mbi institucionet në Prishtinë dhe kryeministrin e Kosovës në mandat teknik Albin Kurti, veprimet dhe retorika e të cilit, sipas tyre, nxisin ekstremistët të vazhdojnë sulmet ndaj serbëve dhe vendeve të tyre të shenjta.

Ata shtojnë se heshtja dhe mungesa e reagimit adekuat vetëm i inkurajojnë autorët të vazhdojnë me dhunën, ku prej kohësh nuk janë kursyer as serbët e vdekur.

„Ministria e Kulturës kërkon zbulimin dhe ndëshkimin e menjëhershëm të autorëve dhe u bën thirrje faktorëve ndërkombëtarë të mos jenë spektatorë të heshtur të shkatërrimit sistematik të trashëgimisë serbe dhe frikësimit të popullit. Republika e Serbisë kurrë nuk do të pranojë fshirjen dhe poshtërimin e popullit të saj dhe të shenjtorëve të tij. Ruajtja e trashëgimisë kulturore dhe shpirtërore serbe në Kosovë e Metohi mbetet detyrë jonë kombëtare dhe civilizuese e përhershme“, përfundon njoftimi.