MPB e Kosovës: Nga 1 nëntori fillon fushata informuese për zbatimin e Ligjit për Automjetet dhe Ligjit për të Huajt

Ministria e Punëve të Brendshme e Kosovës ka njoftuar se nga 1 nëntori deri më 15 janar 2026 do të zhvillojë një fushatë të intensifikar informuese për “të gjithë qytetarët e Kosovës dhe të huajt me qëndrim të përkohshëm ose të përhershëm në Kosovë”, duke theksuar se fokusi i veçantë i kësaj fushate do të jetë informimi i qytetarëve mbi kushtet e pjesëmarrjes në trafik në territorin e Kosovës.

Sipas njoftimit të MPB-së, fushata do të realizohet përmes takimeve me qytetarët, diskutimeve me organizatat e shoqërisë civile, si dhe aktiviteteve informuese në terren, në mediat lokale e qendrore dhe përmes kanaleve zyrtare të komunikimit, me qëllim të zgjidhjes të pyetjeve dhe paqartësive që lidhen me zbatimin e Ligjit për Automjetet dhe Ligjit për të Huajt.

“Fokusi i veçantë i kësaj fushate do të jetë informimi i qytetarëve mbi kushtet për pjesëmarrje në komunikacion në territorin e Kosovës, veçanërisht për automjetet e regjistruara në shtete të huaja dhe çështjet që lidhen me zbatimin e dispozitave ligjore për automjetet”, thuhet në njoftim.

Fushata, siç shtohet më tej, do të ofrojë gjithashtu udhëzime praktike për “hyrjen, lëvizjen, qëndrimin dhe punësimin e shtetasve të huaj në Kosovë”.

“Ministria e Punëve të Brendshme, në bashkëpunim të ngushtë me Policinë e Kosovës, mbetet e përkushtuar për të siguruar bashkëpunim të hapur dhe transparent me të gjithë qytetarët, pa dallim, me qëllim të informimit të drejtë, zbatimit të plotë të ligjeve dhe përmbushjes së obligimeve ligjore”, thuhet në fund të njoftimit.

Qytetarët janë ftuar që për më shumë informacione të ndjekin njoftimet zyrtare në faqen e internetit të Ministrisë së Punëve të Brendshme dhe të Policisë së Kosovës.