MPJ e Serbisë: Aleanca ushtarake e Shqipërisë dhe Kroacisë me autoritetet e Prishtinës është një provokim i hapur

Ministria e Punëve të Jashtme të Serbisë do t’u dërgojë një kërkesë urgjente ministrive të jashtme të Kroacisë dhe Shqipërisë për një shpjegim të detajuar lidhur me nënshkrimin e një memorandumi trepalësh për bashkëpunim në fushën e mbrojtjes, me të cilin këto dy shtete, së bashku me një përfaqësues jolegjitim të autoriteteve në Prishtinë, kanë ndërmarrë hapa që cenojnë stabilitetin rajonal.

"Serbia, si një shtet garant i paqes dhe neutralitetit ushtarak në Ballkan, me të drejtë kërkon përgjigje për natyrën dhe objektivat e këtij bashkëpunimi të sigurisë. Veçanërisht shqetësuese është fakti që kjo aleancë ushtarake po formohet pa konsultime me Beogradin, me përfshirjen e drejtpërdrejtë të një strukture që nuk ka legjitimitet ndërkombëtar dhe që përbën një kërcënim për sigurinë e popullit serb dhe gjithë rajonit”, thuhet në deklaratë.

Theksohet gjithashtu se Serbia nuk do të injorojë as mesazhin e qartë politik të kësaj nisme.

"Është e qartë se ky memorandum nuk është rezultat i një bashkëpunimi të rastësishëm, por një strategji e synuar që ka për qëllim izolimin e Serbisë dhe forcimin e strukturave paraushtarake në provincën jugore serbe, në kundërshtim me të drejtën ndërkombëtare dhe Rezolutën 1244 të Këshillit të Sigurimit të OKB-së", thuhet më tej.

Ata theksojnë se është jashtëzakonisht indikative që dy nga vendet fqinje të Serbisë – Kroacia dhe Shqipëria – kanë vendosur ta nisin këtë marrëveshje dhe se ftesë për t'u anëtarësuar i është bërë edhe fqinjit tonë të tretë – Bullgarisë.

“Nëse, siç pretendojnë ata, kjo marrëveshje nuk është e drejtuar kundër askujt, atëherë ne kërkojmë shpjegim se pse Serbia është e përjashtuar nga çdo negociatë për sigurinë kolektive në rajon? Në veçanti paralajmërojmë se armatimi i njëanshëm dhe bashkëpunimi ushtarak me strukturat ilegale në territorin e Kosovës dhe Metohisë paraqet goditje të drejtpërdrejtë për rendin juridik ndërkombëtar dhe kërcënim për paqen rajonale. Serbia nuk do ta pranojë këtë në heshtje”, kanë thënë ata.

Siç theksojnë ata, si shtet që pavarësisht neutralitetit ushtarak, është aktiv në luftën kundër terrorizmit dhe të gjitha kërcënimeve moderne të sigurisë, Serbia ishte e gatshme të shqyrtonte bashkëpunimin në mirëbesim me Kroacinë dhe Shqipërinë.

"Megjithatë, kjo iniciativë, e cila po zbatohet pa Serbinë, por me Prishtinën, paraqet një provokim të hapur dhe një shpërfillje të rëndë të realitetit në terren. Presim një përgjigje urgjente nga Zagrebi dhe Tirana për qëllimet reale dhe qëllimet përfundimtare të kësaj loje të rrezikshme ushtarako-sigurie. Serbia nuk do të lejojë asnjë veprim të njëanshëm që mund të kërcënojë integritetin tonë territorial, sigurinë e qytetarëve tanë dhe paqen në rajon”, thuhet në deklaratën e Ministrisë së Jashtme serbe.